Accueil Tamazight Azal n 187 n warrazen i yettwaferqen

TIZI-UZZU - Tasfugla n usebɣes n yinelmaden ifazzen : Azal n 187 n warrazen i yettwaferqen

926
- PUBLICITÉ -

Am yal aseggas, deffir kan n yigemmaḍ n yikayaden iɣurbizen useggas (5eme, BEM, BAC), ttwasebɣsen yinelmaden i d-yufraren deg yikayaden-agi, sɣur tanmehla n usegmi n Tizi Uzzu.

- PUBLICITÉ -

Ula d aseggas-agi, Tamehla n usegmi n lwilaya n Tizi Uzzu, tsebɣes akk inelmaden-is n kraḍ n yiswiren n ulmad, i d-yufraren deg yikayaden n taggara n useggas (5eme, BEM, BAC). Tella-d tmeɣra n tukci n warrzen i yinelmaden-agi ass-nni n larebɛa iɛeddan, 25 yulyu 2018, deg Uxxam n umezgun amniḍan Kateb Yacine n Tizi Uzzu. Tɛedda tmeɣra-agi deg tegnatin n tumert d unecreḥ, ḥedren dinna yinelmaden d yimawlan-nsen, anemhal n usegmi Mass Lalaoui Ahmed, lwali n Tizi Uzzu Mass Bouderbali Mohamed akked twacult n usegmi s umata. D Lwilaya akked Useqqamu Aɣerfan n lwilaya (APW), i d-yelhan s tiɣin n warrazen i yettwaferqen i lfayda n yinelmaden-a, ideg llan yiselkimen yettembiwilen (PC), ara yeḥwiǧen deg umecwar-nsen n usegmi ɣer sdat, am wakken i t-id-yenna unemhal n usegmi n lwilaya n Tizi Uzzu. D tasfugla ideg fkan azal n 187 n warrazen i lfayda n yinelmaden i d-yufraren deg yikayaden-agi i d-nebder yakan. Rnan yigemmaḍ igerrzen ɣef useggas iɛeddan s 26 n yinelmaden-nniḍen i yernan ufraren-d aseggas-a, imi ilindi ala 161 n warrazen i yettwaferqen i yinelmaden i d-yufraren. Deg ufraq n warrazen, ad d-nezwir deg uswir amenzu n ulmad, ideg fkan 31 n warrazen i yinelmaden i d-yewwin akayad n 5eme. 19 deg-sen, d wid i d-yewwin tazmilt n 10/10 deg ukayad-a, ma d 12 wiyaḍ, wwint-id-d s 9,90/10. Am wakken diɣen i mudden 85 n warrazen i yinelmaden i d-yufraren deg ukayad n taggara n ulmud alemmas (BEM). Gar-asen 5 n yinelmaden, ḥellan-d tazmilt yugaren 19/20, ma d 80 n yinelmadenn-nni-nniḍen ɣur-sen tanqiḍt yugaren 18/20. Ttwaferqen diɣ wazal n 71 n warrazen i yinelmaden, i d-irebḥen akayad n taggara n ulmad deg tesnawit (BAC), i d-yewwin tazmilt yufraren ɣef 17/20. Am wakken daɣen i fkan arrazen i yiɣerbazen n lwilaya, i d-yeṭṭfen taqacuct n umyezwar deg yikayaden-a. Wigi d 10 n yiɣerbazen imenza, i d-yewwḍen s agemmuḍ n 100%, deg ukayad n 5eme, 5 n yiɣebazen ilemmasen akked 5 n tesnawiyin i yettwasebɣsen s warrazen. Acu kan, arrazen-agi i yettunefken i yiɣerbazen, d allalen ipidakujikiyen, yecban (Tilibizyuwat, Data-show…). Ttwasebɣsen diɣ, yinelmaden, yettekkin deg leqdicat idelsanen d wid n waddal, i d-thegga tenmehla n usegmi d uɣlif n usegmi. Sneɛten-d yimsuddsen-agi, yiwet n tvidyut, ideg i d-tmeslay tneɣlaft n usegmi Massa Benghebrit Noria, i d-yennan belli: “Nekk umneɣ s yigemmaḍ i d-tḥella lwilaya n Tizi Uzzu, ulac deg-sen ccek, imi walaɣ di tirza-w taneggarut, amek i d-yettili usileɣ n yiselmaden. Sarrameɣ ad yili umbeddal n tmussniwin d tirmitin, gar twacult n usegmi n Tizi Uzzu akked tid n lwilayat-nniḍen”. Ma si tama-s anemhal n usegmi Mass Lalaoui Ahmed, deg teywelt i d-yefka deg tesfugla-agi, yessenmer aṭas tawacult n usegmi d uselmed (iselmaden, imaswaḍen, inemhalen…). Yerra diɣ tajmilt i yimawlan n yinelmden, i ixeddmen afud i warraw-nsen i wakken ad ɣren.

Adaoun Abdel Ghani

- PUBLICITÉ -