Par DDK | 30 Juillet 2018 | 935 lecture(s)

At Smaεel

Tasnawit n Ḥusin Ayt Ḥmed, gar semmus n tneggura

Ffɣen-d, ussan iεeddan, yigemmaḍ n ukayad n BAC anda i teṭṭef Tizi Uzzu taqacuct s umḍiq amezwaru s ufmiḍi n 69,18%, Ma yella d Bgayet tusa-d deg umkan wis 24 s 56,02%. Tawilayt n Bgayet, llant deg-s azal n 62 n tesnawiyin, gar-asent tasnawit Ḥusin Ayt Ḥmed n At Smaεel. Taneggarut-a, teṭṭef amḍiq wis 60, neɣ s unamek-nniḍen, tella-d gar tneggura s ufmiḍi n 37,44%. Γas akka llant kra n tmezzugin (spécialités) deg wacu yuli uswir, fkant-d udem acebḥan am tin tusnakt s ufmiḍi n 89% akked tin n tusnakt tatiknikt s 52%, meεna llant tiyeḍ sḥassfen nezzeh yimawlan i waddad-nsent, abeεda tamezzugt n tsekla d tfelseft (lettre et philosophie ) s 25% akked tin n tussna (Science) s 19% kan. Imezdaɣ n taddart-agi, ttcektin seg yigemmaḍ ladɣa ibabaten. La steqsayen ɣef ssebbat n uswir-agi. Ad d-nesmekti d akken tasnawit n At Smaεel d aseggas wis sin i d-tella deg-s tneɣrit n BAC. D ayen yessewhamen, mi ara nmuqel si yiwet n tama, tasnawit-agi, tella gar tid ur nexdim ara asunded (grève ). Rnu i waya iselmaden-is xedmen ayen iwumu zemren, imi rnan timsirin n tedhelt (soutien) i yinelmaden, ama deg ussan n taggara n ddurt neɣ deg yimuṛas. D acu i d aεewwiq ihi? S tmuɣli n umazan Mass Ɛebdun Nasir, ayagi ssebba-s d yiwen mi ara yeḍfer tamezzugt ur as-tlaq ara neɣ ur as-yezmir ara. Rnu ɣur-s, aswir n usɣer, aεemmeḍ n yibabaten d utekki-nsen deg lexsara n warraw-nsen imi ur bedden ara s idisan-nsen. Ɣer taggara, nezmer ad d-nini timuɣliwin mgaradent gar wagi d wihin.

K. K.

0