Medden akk ttcektin seg waddad n twennadt-nneɣ, ladɣa segmi i d-yekcem unebdu. Anda teddiḍ ad tafeḍ ahicur. Ama deg yiberdan-nneɣ, di tẓegwa, neɣ deg wafayen (littoraux). Ula d ibraḥen ur sliken ara, acku imezdaɣ n tuddar, zgan ttdeggiṛen amḍur-nsen sdat n yixxamen. D anwa-t umasay? Γas akka awanek ur yefki ara azal meqqer i temsalt-agi, imi urǧin llan-d yiṣudaf mgal adegger n ugudu di yal amḍiq. Rnu i waya, aṭas n tdayṛiwin ur nesεi amkan anda ara ḍeggrent iḍumman-nsent am tin n Yiɣil Ɛli i t-yettawin almi d Ssur Lɣezlan di Tubiret. Meεna ula d imdanen εemmden ttekkan deg wannect-a. Yak win yebɣan ad ibeddel ttexmam ad yezwir deg yiman-is?. Ur ilaq ara yiwen ad yessenṭeḍ tisebbiwin ɣer udabu kan. Imi win yebɣan, yezmer. Nesteqsa ddeqs n medden ɣef tifrat i ttwalin i uɣbel-agi.« Xussen ttawilat di tmurt-nneɣ. Aql-iken tettwalim timura iteddun ɣer sdat. Ahicur-agi atas ur nezri belli d agerruj, imi ayen yellan deg-s akk nezmer ad as-nεiwed aseqdec». I d-yenna Mass H.T d axeddam deg luzin. Si tama-nniḍen, tenna-aɣ-d yiwet n tmeṭṭut: « A win yufan yal yiwen ad yezwir deg uzrug-ines, ad t-yessezdeg, syin ad tizdig taddart, ad ilint tismin yelhan gar yimdanen, tid iwumu qqaren tismin n uεaned». Ihi limer ad yili lebɣi d usḥulfu n medden s wazal n wallus (recyclage) atas ara ibeddlen. Imi nnulfant-d ddeqs n tkebbaniyin n wallus i yeḥwaǧen afus n tallelt n yimdanen. Ladɣa deg ufran n uhicur-agi i ilaqen ad yebdu seg yixxamen. Ma d wayeḍ iwala ‘’Akka cwiya sɣur-i, azuḥ s ɣur-k, ad nbeddel addad ɣer wayen yelhan.
K. K.