Par DDK | 30 Juillet 2018 | 1012 lecture(s)

Yeffeɣ-d libreOffice s teqbaylit

Ussan-a kan, deg ulqem n useqyed (aɛraḍ) n libreOffice i d-yeffɣen, tettwarna tutlayt taqbaylit i umuɣ n tutlayin i yellan yakan deg-s. Mbeɛd iseggasen n ugani d usideg, yewweḍ-d wass amezray i ttraǧun yimsidag d wid akk yeṭṭafaren amaynut n tutlayt taqbaylit deg umaḍal umḍin d tetiknulujiyin timaynutin. Ad d-nesmekti d akken aseɣẓan-a libreOffice, ideg i d-dukken 6 n yisnasen baṭṭel, d gma-s n Microsoft Office i yettawassnen, maca akken-nniḍen. Meḥsub ayen akk i nezmer ad t-neg yis-s nezmer daɣen ad t-nexdem s libreOffice, imi ula d igrudmawen-nsen, neɣ tiɣerɣar n uqeddic, ttemyettaken anzi. D acu, libreOffice, am akken i t-id-yeqqar yisem-is, d aseɣẓan ilelli n uɣbalu yeldin, ideg kra yellan yemmug-d, ad yettwaseqdec baṭṭel sɣur uzayez. Tzemrem ad d-tzedmem alqem-a n usekyed seg tansa-a, seld afran n unagraw i tesseqdacem: https://www.libreoffice.org/download/download/? type=deb-xṭč_čḥ&version=č.1.0&lang=kab. Mi ara yettwasbedd useɣẓan dayen, tzemrem ad tasem ɣer yiɣewwaren, ad tfernem tutlayt taqbaylit. I telɣut, ahil n usbedd ur inuḥ s teqbaylit akka tura, imi asideg urɛad yekkis 100%. Afmiḍi-ines aql-it tura di 78%. Seld tuffɣa n teẓrigt-a n uɛraḍ, tura d tagnit i ujerreb d tikci n tamawin sɣur yiseqdacen i useɣti n wayen ilaqen ad yettwaseɣti. Aya, imi yewwi-d ur tettɛeṭṭil teqbaylit ad d-teffeɣ deg ulqem unsib n libreOffice. Ad d-nesmekti d akken iqeddicen-a n usideg, tbedd fell-asen yiwet n terbaɛt i yetteklen kan ɣef yiman-is, i d-yettaǧwen tazmert seg tayri i tesɛa i tutlayt-is.

M. K.

0