Par DDK | 30 Juillet 2018 | 765 lecture(s)

Cwiṭ seg tmucuha n leqbayel

Ḥmiṭuc d Duduc deg teẓgi n ṭṭlam

Aḥric 5

Akken kan yuli wass, tjebbed deg-sen tmeṭṭut seg wussu ngum ad d-ldin allen-nsen am win neγ tin icellxen deg yifurkan n tneqlin. Tebḍa-asen daγen deg sin yid-sen yiwet teḥdert n uγrum tamecṭuḥt γef tin n yiḍelli-nni. Ḥmiṭuc yessefruri yakk amur-is, yerra-t γer tecwarit-nni n tqelmunt-is. Deg ubrid γer wissen sani, yessegray am tikkelt tamenzut aḍar-is γer deffir, yezga ibedd-d, yettḍeggir tamuγli-s s anida d-yekka. Yuγal iremmeq-it-id daγen baba-s, yesteqsa-t s usiwel: ‘’Waaa Ḥmiṭuc, d acu tessakadeḍ akka d wakka? Aha azzel tura, ddu d yiman-ik!’’ ? Ḥmiṭuc: ‘’Annaγ a ba, d itbir-iw i yessakadeγ, a-t-an yuli γef uqermud, yeqqaṛ-iy-id s iferrawen-is, awi yid-k talwit a Ḥmiṭuc’’. Miγisa:’’ A lqecc-ik, a tawaγit-ik, d nnegr-ik! Wahin mačči d itbir kan d azerẓur, ur twalaḍ ara d iṭij kan i d-yewwten daγen s aḥelyiw am yiḍelli?’’. Ula d netta mačči d itbir i iwala, d asεeddi kan i ira ad yesεeddi iman-is s imeslayen-is, yella yessalay lewhi i tuγalin s yeftaten-nni n uγrum yessefruri, yesrusu-ten seg tiγilt γer tayeḍ am ttawilat-nni yettwellihen iberdan deg ubrid n ukeṛṛus gar umḍiq d wayeḍ neγ gar temdint d tayeḍ. Tameṭṭut, terra yis-sen d akessar, tessaweḍ-iten s amḍiq urğin kecmen iḍarren-nsen neγ walant wallen-nsen. Sekren times am tnamit, tenna-asen: ‘’Ssrekdet kan dagi tura iman-nwen ay arrac, ma tberdem seg tikli, tzemrem ad tsenndem daγen ciṭuh skud tesseḥma tmes akal! Nekkni ad neεnu anegzum n yesγaren, tameddit mi nessuli nekfa, a d-nedlu γur-wen, ad neglu yis-wen s axxam’’. Yewweḍ-d lawan n imekli, tebḍa Duduc tiḥdert-is n uγrum d gma-s, acku netta yessuzer akk amur-is deg ubrid akken ad d-yaf yis-s lemrira yettarran s axxam n yimawlan-is. Akken kan rẓan laẓ neγ ssarden imawen-nsen s snat telqimin-nni, medlen allen-nsen, ṭṭṣen s uγiwel. Almi d-yeγli yiḍ i d-ukin, iga-as daγen Ḥmiṭuc tabγest i Duduc, yenna-as: ‘’Rğu kan ar d-yeffeγ wayyur n tziri, ad aγ-d-yesken ibruyen-nni n uγrum sseftutiγ, ssmargeγ yakk deg ubrid i d-nuγ γer dagi akken ad t-naf yis-sen ara aγ-yerr s axxam!’’… Tettkemmil

Seg kabyle.com

0