Par DDK | 30 Juillet 2018 | 889 lecture(s)

Tiferdoud - Tezrigt tis 15 n tfaska Raconte-Arts

Tekfa ass-nni n lexmis 26 yulyu 2018

Tella-d tezrigt tis mrawet d semmuset (15) n tfaska tagraɣlant “Ales-d taẓuri”, yettwassnen s “Raconte-Arts”, seg wass-nni n lexmis 19 armi d ass-nni n lexmis 26 yulyu 2018, deg taddart n Tiferdoud, deg tɣiwant Ath Bouyoucef di Micli. Tafaska-agi tagraɣlant, tettheggi-tt-id yal aseggas, Telɣuɣa n tẓuri d ssina (LACD) n Tizi Uzzu, s tallelt n Useqqamu aɣerfan n lwilaya (APW) n Tizi Uzzu, s lemɛawna daɣen n kra n yidisan, yecban, taseqqamut n taddart akked tddukliwin tidelsanin n taddart i tferren yal aseggas telɣuɣa-a. Aseggas-agi, teḍra-d deg taddart n Tiferdoud, yewwin arraz amezwaru n temsizzelt Aissat Rabeh n taddart tazedgant di 2017. Tazrigt-agi tis 15, yewwin asentel-agi “Tizi n Leryaḥ”, yella-d deg-s leqdic adelsan d anesbaɣur, ɣef teɣzi n tmanya wussan, imi tebda s wudem unṣib ass-nni n lexmis 19 yulyu 2018, tekfa lexmis-agi deffir-nneɣ, 26 yulyu 2018. Rzan wazal n 420 n yinaẓuren yemɣalafen, gar-asen azal n 100 d iberraniyen, yal wa asni i d-yusa, d acu i d-yewwi yid-s. Llan yimura, yicennayen, yimsaragen, yinaẓuren, yinḍan...atg. Wid n dagi n tmurt, usan-d si rebɛa n tamiwin n Lezzayer, ma d iberraniyen, tuget deg-sen, usan-d si tmura-a: France, Italie, Espagne, La Russie akked sin n yinaẓuren n tmurt n Congo. Aṭas n leqdicat idelsanen i d-yellan di ttiɛad, gar-asen: Temsikniyin yemgaraden; taqendurt, idlisen, abernus, imuhal n ufus...atg. Llan-d daɣen yisaragen, yisura, umezgun, tmenna n yisefra sɣur yimedyazen, usenzi s ubuddu sɣur yimura, tmeɣriwin n ccna sɣur yinaẓuren...atg. Yal win yerzan ɣer din, yufa ayen yebɣa, nemlal dinna yiwen ilemẓi, ha-t-an wacu i d-yenna: “Ferḥeɣ aṭas imi i d-rziɣ ɣer dagi, ufiɣ iman-iw aṭas. Yal tiɣmert di taddart-agi tella tɣawsa ara ak-ijebden...”. Ma ɣef umaynut n tezrigt-agi tis 15, yenna-d Mass Metref Hcène, anemhal n tfaska-agi: “Aseggas-agi, nerna-d asikew n “Cirque” i warrac imecṭah, i wakken ad-zhun ciṭ, wa ad ferḥen ula d nutni. Imi ilaq yal yiwen ad d-yaf ayen ara t-iɛeǧben. S tmerna n wayen n xeddem yal aseggas, am: yisaragen, taklut, aẓawan...”. Ahil i d-yellan ɣef teɣzi n ddurt-agi taseklant, yella d amerkanti. Yella-d deg-s, yal ass si 10h alamma d 12h usikew “Amaru, adlis”, ideg i d-sneɛten 22 n yimura n yineggalen idlisen-sen. Gar yimura i d-imeslayen ɣef yidlisen-nsen, ad-nebder; Amine Zaoui, Arezki Metref, Karim Younes, Ikram Kebir, Daho Djerbal...atg. Llant-d daɣen ddeqs n tmeɣriwin n ccna ideg cnan waṭas n yinaẓuren gar-asen Baaziz, Agraw Awal n Takut, Arezki Meziane, Akli D...atg. Am wakken daɣen tuɣal tejmilt meqqren i umeɣnas n tugdut Kamel Amzel, mmi-s n taddart-agi n Tiferdoud, s tunṭict n yisefra “Aɛeqqa Yessawalen”, sɣur yimedyazen-a; Rachid Akkache, Ahcene Mariche, Ben Mohamed, Hadjira Oulbachir...atg. Ma d iswi ajejdan n tfaska-agi, d asnerni d unegmu n yidles amaziɣ d umaḍlan deg tmurt n Leqbayel, d asenɛet n leṣnaf yemgaraden n tẓuri d tinḍi akked usebɣes n yinaẓuren d yinḍiyin, d uẓeṭṭa n tegmat d tdukli gar yigduden n umaḍal merra.

A. A.

0