Par DDK | 30 Juillet 2018 | 577 lecture(s)

Aɣlif n uselmed uffrin d unadi ussnan

Yebda seg wass-nni n lexmis ujerred n yisdawanen imaynuten

Inelmaden i d-yewwin akayad n taggara n tesnawit BAC, bdan jerden iman-nsen deg tesdawiyin n tmurt seg wass-nni n lexmis 26 yulyu alamma d ass n 16 cutember 2018, i lmend n useggas asdawan 2018-2019. Ad yili ujerred-agi ɣef 4 yimecwaren (étapes), amecwar amezwaru, yebda ass-nni lexmis 26 yulyu 2018, alamma d ass n ssebt 07 ɣuct i d-iteddun. D talliit ideg ara ad d-yili ujerred amezwaru, ideg ara fernen yisdawanen-agi imaynuten tiskiwin ara ɣren seg tazwara n waggur n tuber i d-iteddun. Deg umecwar-agi amezwaru ad naf, seg 26 alamma d 28 yulyu, yella-d ujerred amezwaru s ttawil n internet. Ma d asentem (confirmation) n ujerred amezwara, yebda iḍelli n lḥed ad ikemmel ass-agi n letnayen 30 yulyu 2018. Seg uzekka alamma d ass n 07 ɣuct 2018, ad fernen yinelmaden ayen ara ɣren, gar wayen n teskiwin i d asen-d-yettunefken, ad fernen gar-asent. Am wakken daɣen i yexdem uɣlif-agi, tiwwura yellin deg tesdawiyin, yebdan ass-nni n ttlata 24 alamma d ass-agi n letnayen 30 yulyu. Ma d iswi n tewwura-agi yellin, d awelleh iwatan i yinelmaden-agi imaynuten, d tagnit daɣen i wakken ad ẓren d acu bɣan ad ɣren di tesdawit. Amecwar wis sin, ad yebdu ass n 08 alamma d 16 ɣuct, yebḍa ɣef kraḍ n talliyin. Tamezwarut, seg 08 alamma d 12 ɣuct, ad yili deg-s yikayaden (tests) i kra n teskiwin. Tis snat, gar 08 alamma d 15 ɣuct, d asrusu n zzmamat n tmezduɣt di tesdawit. Tis tlata, gar 13 alamma d 15 ɣuct, i uɛiwed n tmuɣli deg yinelmaden-nni ixesren ikayaden-nni n unekcum, ad yili uwelleh-nsen ɣer wayen-nniḍen. Alaḥsab n tfenda, i d-yefka uɣlif n uselmed uffrin d unadi ussnan, ass n 16 deg waggur-agi i d-iteddun, zemren yinelmaden ad ẓren d acu iten-ceggɛen ad ɣren. Amecwar wis tlata, d ayen yerzan ajerred aneggaru. Annect-agi ad yili gar 02 alamma d 06 cutember i d-iteddun. Ma d amecwar wis rebɛa, ad yili deg-s usersi n zzmamat n usiweḍ d wid n la Bourse.

Ghani Amazigh

0