Ddeqs n yiεewwiqen i d-yettilin di tudrin-nneɣ n yal ass. Abaεda lexsas n waman, iberdan, akked trisit i igezzmen si tikkelt ɣer tayeḍ. Ugar n waya, llan yiεewwiqen-nniḍen, tlaq-asen tifrat s uɣiwel, acku mačči iḍelli neɣ ass-a i d-nnulfan. Yerna dayen iḍurren nezzeh imezdaɣ, am temsalt n lexsas di tumnayt (transport) i yellan deg ḥawla n tudrin tiqbayliyin. Ama di Bgayet neɣ di Tizi Uzzu, xilla n temnaḍin i yettcektin seg liḥala-agi. Amedya taddart Lemṣella lwaḥi d taddart At Igraεwen i d-yezgan di tɣiwant n Illula Umalu di Buzgen, i yettidiren yir ussan ɣef ssebba n tumnayt-agi (ttawilat n usiweḍ) i ɣef nettmeslay. «Ugur-agi nesεa-t si zik, mačči alammi d tura. Ula d iḍarren-nneɣ qqerṣen, acku nleḥḥu ɣef uḍar ugar n uzgen n ssaɛa i wakken ad naweḍ ɣer taddart. Yerna ayagi ama deg unebdu neɣ di ccetwa, ssbeḥ neɣ tameddit». D imeslayen, i d aɣ-d-tenna yiwet n temsiwt si taddart n Lemṣella. Ma d wid ixeddmen s ifurguten, si tama-nsen zgan qqaren-d ayen-nniḍen i wigad i ten-yesteqsayen:« Tudrin-agi beεdent aṭas, yerna iberdan yettawin ɣur-sen ur lhin ara. Ula d nekkni nenṭer yid-sen». Ad d-nesmekti belli, ula di Bgayet, ddeqs n tuddar i iḥuza uɣbel-agi. Seg-sent, d amedya kan, taddart n Tizi Ɛidel, i ibeɛden s wazal n 10 n yikilumitren ɣef tɣiwant n Tmuqra. At taddart-agi daɣen, akken ma llan, ssaramen imḍebbren n tɣiwant ad fken azal i taluft-agi, ahat ad tenqes fell-asen taεkemt sya ɣer sdat.
K. K.