Tazrigt tis semmuset (6) n warraz aseklan Mohammed DIB n useggas-a 2017-2018, mḥezwaren fell-as wazal n 20 n yineggalen, yettarun s 3 tutlayin-a: tamaziɣt, tafransist akked taɛrabt.
Yetturaǧu ad tili tisfugla n ufraq n warrazen-agi, ass n 13 tuber i d-iteddun deg tgelda n yidles Abdelkrim Dali n Tlemcen. Ad yili ufraq n 6 n warrazen: arraz amezwaru d wis sin i yal tutlayt. Taseqqamut n ufran, iɛemren yimura d yimeɣriyen s tlata n tutlayin-agi i d-nebder yakan, bdan taɣuri n wungalen-agi i yettekkin deg tezrigt-a tis setta. D Mass Sari Mohamed, amaru-imsenqed aseklan, i yellan ɣef uqerru n teseqqamut-agi n ufran i tezrigt n useggas-agi. S tutlayt n tmaziɣt, ttekkan 10 n wungalen, i yuran yineggalen-agi: Djejiga Anaris, Belkacem Meghzouchene akked Fahim Messaoudene. 18 n wungalen-nniḍen s tutlayt n taɛrabt, i yuran 7 n yimura-agi: Bedreddine Khelifi, Karima Benali, Amina Cheikh, Mohamed Kadik, Mohamed Katilitah, Nadjet Dahmon akked Ismail Ibrir. Ma s tutlayt n tefransist, ttekkan 32 n wungalen, i yuran 10 n yimura-a: Amine Zaoui, Mohamed Sadoun, Slimane Saadoun, Amina Mekahli, Adlène Meddi, Mohamed Magani, Aicha Kassoul, Selma Guettaf, Jaoudet Gassouma akked Lynda Chouiten. Ɣer taggara, ad d-nesmekti kan belli, arraz-agi aseklan Mohammed Dib, yettheggi-t-id, yal aseggas, Ddiwan aɣelnaw n yizerfan n umeskar d yizerfan uqriben (ONDA), s tallelt n Tkebbanit taɣelnawt n tẓuri d usizreg (ENAG).
H. M.