Par DDK | 6 Aout 2018 | 926 lecture(s)

Tizi Uzzu - Asalay amniḍan n umjahed

Asmekti n temhelt n jumelles

Yesmekta-d ass-nni n larebɛa yezrin 01/08/2018, Usalay amniḍan n ujahed n lwilaya n Tizi Uzzu, tamhelt n jumelles, i d-yellan deg 22 yulyu 1959 di tmurt n Leqbayel. Yella-d usmekti n wass-agi amazray, yesɛan azal meqqren deg tegrawla tazzayrit 1954-1962, s wahil d amerkanti. Deg tesebḥit maḍi, tella-d tirza ɣer tzeɣwa n temsikniyin, ideg i d-llant kra n temsikniyin yeqqnen ɣef temhelt-agi s wuzzig akked tid yerzan tagrawla s umata. Syin akkin deg tzeqqa n yisaragen, yebda leqdic s wudem unṣib s useɣet aɣelnaw “Qasaman”. Tin ɣur-s, yella-d usarag n uduktur deg umezruy n tegrawla, mass Sahel Youcef, i d-yewwin awal s telqey ɣef temhelt-agi d wayen s wacu i d-tegla i lwilaya tamazrayt tis tlata (Tamurt n Leqbayel). Mi yesuli usarag-agi, yella-d uskaci s tuttriwin i d as-yettunfken i umsarag, netta si tama-s yerra tiririyin i lmend n yisteqsiyen n wid yellan dinna. Am wakken daɣen i d-llant snat n tnagiyin n sin yimeɣras-agi: Almanasba Arezki d Belkacem Youcef, i d-yefkan ccfawat-nsen ɣef temhelt-agi n jumelles. Yella-d diɣ usbadu n kra seg yiwudam imazayen n tegrawla, i yemmuten deg waggur n yulyu. Yella umeslay ɣef tudert d yimuhal n yimɣrasen-agi: Amar Ouamrane, Zamoum Mohamed yettwassnen s yisem n Si Salah, Aissat Idir akked Karim Rabah. Uqbel ad yesali leqdic-agi, tella-d tɣuri n yizen n Amirouche Ait Hamouda i yinelmaden n tmussni, ma ɣer taggara d talilt (chorale) n tiddukkla “Tarwa n Bugarfan” n Ath Yahia Moussa, i d-yewwin kra n ccnawi n lgirra. Ma ɣer taggara, ad nesmekti belli, leqdic-a yella usuddes-ines sɣur Usalay amniḍan n umjahed s tallelt n Ddiwan n yisɣuren n yilmeẓyen (ODEJ) n Tizi Uzzu.

A. A.

0