Par DDK | 6 Aout 2018 | 462 lecture(s)

Cwiṭ seg tmucuha n leqbayel

Ḥmiṭuc d Duduc deg teẓgi n ṭṭlam

Aḥric 6

Tiziri, tessa-d γef tmurt, nutni kkren γef yiman-nsen, beggsen agusen-nsen, maca iftaten-nni n uγrum neγden-ten akk yifṛax, yiwen deg-sen mačči zeglen-t a tawaγit. Teddun kra yekka yiḍ, rnan yiwen wass d yiḍ-nniḍen war asteεfu, medlent akk tewwura, tezzin tennḍen kan din deg telqaεt n teẓgi, ur d-ufin ara yakk abrid yessufuγen. Akken i d-asen-tewweḍ tfidi s iγess, laẓ yewwet-iten s amelγiγ, tigecrar-nsen kkawent, iḍarren-nsen hebbjen deg-sen am yiqjan seg teqreḥ d εeggu, myeẓmaḍen wa γer wayeḍ s ddaw yiwen ubawal, ṭṭṣen daγen. Azekka-nni akken i d-ukin, uγen abrid γer sdat, hemmlen kan, teddun ttafen iman-nsen rennun γemqen deg teẓgi. Rwan acali almi i ten-id-ssawḍen kraḍ (3) wussan d kraḍ (3) wuḍan yeqqnen deg tnelli, ddren berra n uxxam yerna lemmer ur ttafen ara s uγiwel γas ulamma d kra n telqimt, ad rẓen yis-s laẓ, ad jafen imeγdaṛ, ad ssleqfen am yifrax. Ɣef lewhi n yimekli, yessemlal-iten-id uεessas d yiwen ufrux amellal am udfel, seg wakken ḥlaw ccna-s d wamek yesčewčiw, ur uḥtamen ara d yiman-nsen almi i d-ufan imannsen am wakken yeddubbez neγ yesbek kra n umecwar laẓ-nsen, ḥebsen fkan-as tameẓẓuγt. Akken yessuli ccna n tezlatin-is, yeğğa-d afurek-nni iγef yella yers yesseḍway akka d wakka, yesrafeg sdat-sen, yettferfir kan ddac, ddac, nutni ḍefren-t si deffir. Yessaweḍ-iten γer yiwen n uxxam yettwaseqqfen s teγrifin d-yetteεluluqen seg yal tama-s am uqermud-nni n yixxamen n leqbayel iqburen, winna iwumi neqqar yettwali-d ur d-yekcim. Tiγrifin snint ta deffir tayeḍ d akessar amzun d itemriwen (tayni) γef tezdayt yurwen akken yessefk. Ḥmiṭuc d Duduc, tuγ-iten tegnit ddreγlen seg laẓ aberkan, jgugglen deg-sent, qeṛmen-tent-id war akukru, γlin deg lweεd-nsent. Urεad ssadren tiγrifin-nni timezwura, slan i taγect tamelḥant n tmeṭṭut imi tcennu, teqqar: ‘’Ɣef ubrid, γef ubrid ur cfin, anwi wigi i igezzren akka tiγrifin?’’ Ḥmiṭuc d Duduc, rran-as tiririt, nnan-as: ‘’Mačči d wid yessḍen, mačči d wid yessḍen, d At waman isemmaḍen’’… Tettkemmil.

Seg kabyle.com

0