Accueil Tamazight Ddurt tadelsant i yimerriyen

Aẓeffun : Ddurt tadelsant i yimerriyen

981
- PUBLICITÉ -

Tiṭ ad tezzi di tikkelt-agi, ɣer leqdicat idelsanen i d-yettilin ussan-agi, i lmend n yimuras n unebdu, anda i ttfaresen akk medden tagnit rezzun s waṭas ɣef yillel. Dɣa tettwasuddes-d yiwet n ddurt tadelsant n usenɛet n yisura, i d yeḍran deg Uẓeffun. D ttiɛad i yebdan, seg wass-nni ssebt n 28 Yulyu arma d ass-nni n ssebt yezrin 4 di Ɣuct-agi ideg nella. D leqdic yettwahegga-d sɣur tmehla n yidles n lwilaya n Tizi Uzzu akked taɣiwant n Uẓeffun. Ma d ahil yettwaxdamen, yella-d akka; deg wass amezwaru, i d-yellan ass-nni n ssebt 28/7/2018, llant-d deg-s timsikniyin sɣur yinaẓuren n tɣiwant n Uẓeffun, yecban: tiqendyar n leqbayel, inawalen iqburen akked yimaynuten…atg. Ma d ass-nni n lḥed 29/7/2018, i d-yellan d ass wis sin deg wahil, yella-d deg-s d usarag sɣur mass Messaoui Sofiane akked mass Kader Belaidi, i d-yewwin awal ɣef usentel i wumi semman : “Aẓeffun deg teglest (antiquité)”. Yella-d leqdic-agi deg tṣebḥit n wass deg uxxam n tmeɣriwin n tɣiwant-a, ma yella deg tameddit n wass, yella-d uskan n usaru “Krim Belkacem” s tutlayt n Tmaziɣt i d-yessuffeɣ Ahmed Rachedi, am wakken daɣen i d-yella usenɛet n usaru-a “le voyage des Bélivaire” s tutlayt n tefransist .Ass-nni n letnayen yezrin 30 n yulyu, yella-d leqdic adelsan s wazal-is deg temkarḍit n tɣiwant-agi n Uẓeffun. D ahil i d-yettwaheggan sɣur tiddukkla n yigerdan yuḍnen n tama-a, anda i d-llan ddeqs n yisikwan, yecban winna n wuraren, ccnawi akked tzeɣwa n leḥsabat…atg. Am wakken daɣen, i d-yella wahil n usenɛet n ddeqs n yisura deg teftist, i d- yeddan seg 31 yulyu arma d 04 deg ɣuct-agi yezrin. Ahil-agi n yisura, yettwahegga-d sɣur tmehla n yidles n Tizi Uzzu. Yella-d akka; yal ass ttilin-d sin n yisura, yiwen ssbeḥ wayeḍ tameddit. Gar yisura-agi i d-yettwasneɛten, ad nebder: Le Hublot, Le silence du Sphinx, Je te promets, Papillon, Point de fuite wigi akk d isura imeẓyanen. Ma d isura imeqqranen i d-yettwasneɛten d wigi: Memoire de scène, En attendant les hirondelles, Les intrus, Lalla Zoubeida ouaness…atg.

- PUBLICITÉ -

Yamani Souhila

- PUBLICITÉ -