Par DDK | 6 Aout 2018 | 1032 lecture(s)

Suq Letnin

Tirza n yimiyupaten (imeɛder) ɣer teftist

Thegga-d ussan iɛeddan tdukkla n Bgayet mgal aṭṭan n tmaẓwalt (muscle) DEFI, tadwilt n uḥewwes d usteɛfu i lfayda n yimiyupaten-is, deg teftist n Ssuq Letnin, i ibeɛden s wazal n 25 n yikilumitren ɣer usamar n waɣir n Bgayet. Am yal aseggas, yusa-d ttiɛad-a deg yimuras akken ad yefk tagnit i yakk imuḍan, ama ɣarren neɣ ala, ad sɛeddin akuden meqrub illel. Ad d-nesmekti belli, anejmuɛ d tiwin-nsen yella-d deg uɣerbaz amenzu "Musuni Muḥend" n tɣiwant-a i d-nebder yakkan, lwaḥi d waṭas n yiɛeggalen d yimeltaɣen (adherents) n tdukkla-a i yettɛewwilen ddima i ugerrez n lecɣal. Ad d-nemmeslay daɣen ɣef umaynut n useggas-a, imi d-llant tikkelt-a snat n tedwilin i yimeɛder. Ihi, rnu ɣef usuddes-a, xemmen yiɛeggalen n DEFI ad xedmen tadwilt tamezwarut i warrac imuḍan i ur newwiḍ ara 16 n yiseggasen. Syinna, mi tekfa tuffɣa n yimeẓyanen, tebda tinna n yimeqqranen ass n 24 deg waggur n yulyu yezrin. Ayen isferḥen aṭas imuḍan-a, imi ula d abrid ideg ara lḥunt tceryulin armi d rrif n yillel, gan-t yiɛeggalen n tdukkla DEFI s tallelt n Tmehla n tigawt tinmettit (DAS) n Bgayet. S teplakin n usɣar, yemmug ttawil i tceryult amek ara tettwanher armi d rrif n yillel war ma yella-d yijdi (rrmel) d ugur. Rnu ɣer waya, tettwahegga-d daɣen tqaɛet anda zemren ad sgunfun yimuḍan-a n tmaẓwalt ddaw n ssiwan. D ayen i isferḥen wid akk yekkin deg usuffeɣ-agi, imi iɛjeb-asen ayendin tteḥwis n useggas-a; ideg ɛumen deg teftist, mbaddalen tikta, cnan d agraw, d waṭas n yiqeddicen-nniḍen. Imi deg tegnatin yecban tidak, ttuɣalen d tawacult i izeddin aṭas n tlufa gar-asen. « Nebda-tt-id s umciwer, akken ad d-naf amkan iwulmen, syinna nxemmem ad nexdem abrid ɣer teftist akken ur ttenɛettaben ama d imeddukkal n tdukkla ama d imiyupaten. Dɣa i lmend n waya, ad snemmreɣ Tamehla n tigawt tinmettit mi aɣ-tɛawen. Nesɛedda tiswiɛin yelhan ». i d-tenna tselwayt n DEFI, Nura Ayt Ɛebderreḥman.

M. K.

0