Par DDK | 13 Aout 2018 | 864 lecture(s)

Aswel

Gar zik d tura

Wagi d aqerru n yiwen n uṛebbit iwumi qqaren Aswel. Yewwi isem n usmideg-a aswel i d-yezgan di tmurt n Yiqbayliyen deg udrar n Ǧerǧer, gar Tigejda akked Tleṭṭaṭ, imi zik-nni adeg-a, yella d aburkam (abulkan / taẓrutmest).

Aswel, segmi meẓẓi iḥemmel aman yerɣan yuwlen, yezga deg yessucufdeg Uswel, imi di tallit-nni mazal-t ur yensi ara, yeččur d iḥlulen n tmes irekkem yesbeqbuqen. Tikwal, yettgeffiɛ isussuf, yettḍeggir ɣer beṛṛa, sakin ttismiḍen teqqlen d aẓru armi d-ḥejben s tɣaltin si yal tama. Yewwi talɣa n tkirwant i nettwali ass-a. Aṛebbit-a, Aswel aqbayli, aṭas n leqrun i yedder. Yesten ɣef tmurt n leqbayel d ugafa aferkan mgal n yinekcamen, imi tazmert yesεa, ur tt-sεin yirebbiten-nniḍen n umaḍal s umata. Acḥal seg-sen yenɣa ; yesruɣuy-iten s tmes i d-yesuffuɣ seg yimi-s, yal mi ara d-εefsen tamurt. Di tallit-nni n yiṛebbiten, illel-agi agrakal, yella kan d asif ameqqran ahrawan, yebḍa gar umenẓaw n Tferka d Tuṛuptukkud, yemseεdaw d kra n tmura am Yiṛumanen d Yeɣriqen…atg. Asmi yeḥṣa Meɣres (Mars), aṛebbit n umgaru, yellan di tama n wakin i yillel, yezger-d ɣer Tferka yebɣa ad ineyyer Aswel ; yennuɣ yid-s ddeqs n yiseggasen, ur myernan ara. Meɣres, d bu tegzi u d bab n tezmert, yufa-d ansi i d as-d-tettas tezmert n tmes swayes yesseknaf ifnaten-ines ; yeḥṣa seg uswel. Amek ara yexdem akken ad as-yeskew agelmim-a yeččuren d times i wakken ad t-ineɣ ad as-yerreẓ lhiba yekseb s teɣzi n leqrun ? Ixemmem Meɣres ixemmem, akken qqaren wat zik : « Win yettnadin, yettaf ». Yufa-d ilaq ad as-yeflu agelmim i wakken ad yenxer uḥlul i t-iεemṛen, ad as-t-yessilem, ad as-yessexsi ilizeq akken ad as-truḥ tezmert-is swayes iqehher icenga-s. Iɣewwes di tegnawt, yeffeɣ seg-s yudef di talunt, yerra srid ɣer ugensatriw Meɣres ; iḍerreq-d seg-s takubba si tanga ur nelli da deg Udrar n Ǧerǧer iwumi semman Yiṛumanen di tallit-is “Adrar n Wuzzal”, seg wakken ur yezmir uwerdani ad t-id-yadef. Yemmeɣ-d Meɣres srid s Aswel, ad t-yekkes i lebda, ad yethenni seg-s akken ad d-yerkeḍ Tamurt. Yuɣal-d am lebraq, tuɣalin iɣef ur tceffeq fell-as la tiṭ n umdan, wala tin n lbaz aremmaq. Yewwet-d s yixef n tkemmit-is s agelmin ɣer tama n unẓul n Ǧerǧer. Tefla tkirwant n uswel, yessanef, yenxer ddaw n tmurt yenǧer asif, uzzlen deg-s yeḥlulen. Di tallit-nni, qqaren-as Asif azeqlan, u segmi semmeḍ ar ass-a, ssawalen-as Asif Asemmaḍ i d-yezgan imir-a di tmazya n Yimceddalen, lwilaya n Tubiret. Ma d anda akken yebbeɣtikemmit, yewwi isem n “Anu n Yiflis”, sakin isuddem, yenɣel akk armi d-tban telqeyt-is, yenǧer iḥemmal. Aṛebbit Aswel, tezri fell-as yir tagnit. Yerra ɣer tama n ugafa anda mazal iḥlulen n tmes uqbel ad ismiḍen. Iεawed Meɣres ineggez si tɣaltin n yiceṛfan n wadda ɣer tid n ufella, yewwet daɣen s tkubba-s ẓẓayen taẓẓeyt n udrar. Iḥuza islaḍen yellan d agadir iqublen tama n ugafa, dgedgen grarben, yenɣel daɣen wayen i d-yeggran seg-s, u suddmen, neǧren asif ɣer tama n At Wasif, i d-yezgan deg ugezdu n Tizi Uzzu. Aswel, yeɛreḍ ad yedderbez ɣer yimi n lεinṣer iseg i d-yettgeffiε d asawen yilizeq-is i mazal ur yensi, imir-imir, yezwer-it Meɣres, yegzem-d taqincurt si Akuker s talɣa n ukaswar, yergel yis-s imi n yilizeq, yexsi seg wass-nni ar ass-a. Ass-agi, ṛṛeṣfa-nni ibubben tarṣift, ur telli zik d rreṣfa wala d tarṣift, tella d tafekka n uṛebbit Aswel. Rreṣfa, terṣa di lqaεa, ma d tarṣift yersen s ufella-s, d aqerru-is i d aɣ-yettraǧun melmi ad nesseḥmu aswel-is. Yerna ad t-id-nerret, imi ala netta i nesεa d aṛebbit-nneɣ amḥaddi. Tadyant-a, teḍra zik, ɣef wakken i yaɣ-d-ttalsen yimɣaren; si tsuta ɣer tayeḍ, armi i d aɣ-d-tewweḍ ɣer tagi-nneɣ, ayagi i d aɣ-d-ttalsen, ur yelli d tumgist ur yelli d amyi.

Ahmed Hamoum

0