Par DDK | 13 Aout 2018 | 584 lecture(s)

At Smaεel

Aqeεεed n yizergan seld asenfar n lgaz n temdint

Am tuddar akk n yidurar, taddart n At Smaεel, ɣas ma yella aṭas i ibedlen deg-s, ladɣa iseggasen-agi ineggura, meεna ddeqs n uxeddim d lecɣal i d-yeggran i wakken ad yelhu waddad n tɣiwant-agi.

Ama d lexsas n waman, neɣ d tamsalt n yiberdan, ɣef wacu zgan yimezdaɣ ttcektin seg liḥala-nsen. Seg yiwet n tama, ma yella nemmeslay-d ɣef yiberdan imeqqranen, nezmer ad d-nini yekfa deg-sen uxeddim, am win yellan gar Lburj n Mira akked d At Smaεel. Rnu i waya, wid yessawaden seg tlemmast n tɣiwant i tuddar-is-nniḍen. Ma seg tama-nniḍen, iberdan n tezniqin d yizriben imecṭah, mazal ur ssulin deg-sen lecɣal. D ayen i yeǧǧan imdanen ccektayen, ladɣa imi d tagrest i d-iteddun. «Limer kan kemmlen i wayen i d-bdan. Aqli-ken tettwalim aɣebbar amek i yuli, akka deg unebdu. Ma yella di tegrest, d aluḍ i yeččuren tizniqin-agi», i aɣ-d-yenna yiwen n urgaz seg At Tεisiwt. Ma d yiwet-nniḍen tenna-d:« Llant tuddar, iberdan-nsent akk d abiṭun, ula d nekni nessaram ad d-yas was anda ara yekfu fell-aɣ lhem-agi». Mi netseqsa aselway n tɣiwant-a, yerra-aɣ-d : «Ur nezmir ad nkemmel lecɣal-agi uqbel ad yekfu usenfar n lgaz. Acku, akken qqaren: ’Ameyyez uqbel aneggez’. Ur nxeddem ara ccɣel snat n tikkal. Aseggas-agi ad d-nelhu d usenfar n lgaz, asmi ara yekfu, imir-n ad nseggem liḥala n yiberdan-agi». Lḥasul, ssaramen yimezdaɣ deg yimḍebbren n tɣiwant, ad ssamden lecɣal, s wayen ara d-yawin abaɣur i taddart s umata.

K. K.

0