Par DDK | 13 Aout 2018 | 527 lecture(s)

Souk El Ténine

Asuddes n yiwet n temhelt n usizdeg n ubrid n ugerzu wis 147

Deg tazwara n ddurt iɛeddan, heggan-d yiɛegallen n Useqqamu aɣerfan n tɣiwant n Souk El Ténine, yettabaɛen ɣer dayra n Mɛatqa, u s lemɛawna n yiɛeggalen n Useqqamu aɣerfan n tɣiwant n Umecras, yettabaɛen ɣer dayra n Buɣni, yiwet n temhelt n usizdeg n ubrid n ugerzu wis 147 icudden aṭas n tɣiwanin n ugerzu, gar-asent taɣiwant n Souk El Ténine d tɣiwant n Umecras. Yusa-d leqdic-agi, seld yir liḥala uɣur yewweḍ ubrib n ugerzu wis 147. Aya, ssebba-s d iguduyen n yiḍuman i izelgen udem n snat n tɣiwanin-agi. Ulac tiɣmert zegglen yiguduyen, seg tɣiwant n Souk El Ténine alamma d taɣiwant n Umecras, ladɣa deg ugudu n Baylek i iɣelqen acḥal d aseggas aya. Yeggra-d ubrid wis 147 deg yir addad seg yiḍuman i ṭeggiren yimsebriden n yal ass deg leryuf n ubrid-agi. Aya, dayen i d-ixelqen iguduyen ur yezgilen ara ula d yiwen n wadag deg ubrid-agi. Ulac amḍiq anda ur tettafeḍ ara ixuččan d iḍuman, ladɣa iqerɛunen n yiɣisem. Ɣef waya, smarsen yimḍebren n snat n tɣiwanin ttawilat yakk iwatan deg temhelt-agi, ama d ayen yeɛnan ixeddamen, ttawilat n usiweḍ d ttawilat n uɛemmer d uḍummu, i wakken ad sneqqsen i twaɣit-agi. Ad nesmekti kan d akken mačči d tikkelt tamazwarut i d-heggant tɣiwanin-agi leqdicat n usizdeg n ubrid wis 147, maca yettuɣal dima ɣer waddad-ines, s sebba lexṣas n tnuggit n yimdanen d imsebriden yetṭeggiren kan iḍuman-nsen deg yal tiɣmert n ubrid. Tamsalt n tezdeg d tamsalt n yal amdan, yal yiwen yewwi-d fell-as ad yesseḥbiber ɣef twennadt d ugama i deg yettidir. Ass-a yewwi-d uɛiwed n tmuɣli deg tikliwin i icudden ɣer tezdeg.

Ali Zalouk

0