Accueil Tamazight Tekfa tezrigt tamezwarut ass-nni n larebɛa iɛeddan

TIMIZAR Rreḥba n tẓuriwin d tgemmi : Tekfa tezrigt tamezwarut ass-nni n larebɛa iɛeddan

1171
- PUBLICITÉ -

Tella-d ddurt yezrin, tezrigt tamezwarut n rreḥba taɣelnawt n tẓuriwin d tgemmi, i d-yellan di Suq Lḥed talemmast n tɣiwant n Tmizar n Sidi Menṣur, i d-yezgan deg ugafa-asamer n lwilaya n Tizi Uzzu, tebɛed ɣef temdit-a s wazal n 30 n yikilumiṭren. D tazrigt yeddan ɣef teɣzi n 5 wussan, imi telli tiwwura-a ass-nni n ssebt 04 ɣuct 2018, tessuli larebɛa-agi iɛeddan 08 di ɣuct-agi ideg nella. Tella-d tesfugla n tulya tunṣibt, ssebt-nni iɛeddan, anda i d-iberreḥ uselway n useqqamu aɣerfan awilay (APW) n Tizi Uzzu, Mass Youcef Aouciche s tukci n usekbel (subvention) n tedrimt s lqidar n 500 000 DA. Deg wawal-s, yuɣal-d dɣa ɣer wazal sɛant tfaskiwin d tmerɣiwin-agi n tgemmi ɣef tdamsa n tmurt, d ayen i yeǧǧan tuddsa-agi n (APW), ad tɛiwen azal n 20 n tfaskiwin d rreḥbat i d-yettilin yal aseggas di lwilaya n Tizi Uzzu. Ma ɣef wahil n rreḥba-agi, yella-d d anesbaɣur, anda i llant wazal n 80 n temsikniyin sɣur ugar n tmanyin n yimsikniyen i d-yerzan seg 15 n lwilayat n tmurt yecban; Lemdiya, Mila, Sidi Bel Ɛebbas, Lezzayer, Adrar, Tamenrasset…atg. D timsikniyin yemgaraden, i icudden merra ɣer tgemmi tamaziɣ s wuzzig d tgemmi tazzayrit taɣelnawt s umata, yecban afexxar, lfeṭṭa, asewwi n leqbayel, iselsa…atg. Am wakken diɣen i d-llan ɣef teɣzi n 5 wussan-agi n temsikent, leqdicat idelsanen deg uɣerbaz alemmas n Suq Lḥed. Ma d tasfugla n taggara, tella-d larebɛa-agi deffir-nneɣ deg tmeddit n wass, llan-d deg-s daɣen waṭas n leqdicat. Am wakken i d-yuɣal diɣ uselway n tɣiwant n Tmizar Mass Lounes Djouadi ɣer tikti n rreḥba-agi, dɣa yenna-d: “D tiddin i nedda ɣer sdat, imi di 2010 d 2011 nexdem rreḥba n tinḍi, ma d tura d rreḥba taɣelnawt d tgemmi d tẓuri”. Ma si tama-s uselway n tddukkla Tigemmi, Mass Ferhat Dahmane, yenna-d: “Iswi-nneɣ deffir n usuddes n rreḥba-agi, d aseḥbiber ɣef tgemmi akked tẓuriwin-nneɣ. D tagnit daɣen i umbaddal n tektiwin gar yinẓuren akked yimdanen, d adeg diɣ n tunzut n yinḍan-nneɣ yenṭṭaren aṭas”. Ad d-nesmekti kan belli taddart n Tmizar n Sidi Menṣur, tewwi arraz amezwaru n temsizzelt n tezdeg Aissat Rabah deg useggas n 2015. Tettwassen daɣen tama-agi s tfellaḥt, ladɣa s ttrebga n lmal akked tmeɣra n uyefki. Ɣer taggara, ad nebder imsuddsen n rreḥba-agi tamezwarut taɣelnawt n tgemmi akked tinḍi n Tmizar, ad nezwir si tiddukkla “Tigemmi” i useḥbiber ɣef tgemmi d tẓuri tamensayt, s tallelt n useqqamu aɣerfan aɣiwan (APC) d win lwilaya (APW) n Tizi Uzzu. S lemɛawna n tenmehla n yidles, tanmehla n waddal d yilmeẓyen, taxxamt n lḥiraft ufus…atg.

- PUBLICITÉ -

Ghani Amazigh

- PUBLICITÉ -