Par DDK | 13 Aout 2018 | 911 lecture(s)

ATH HICHEM -Tazrigt tis 11 n uẓeṭṭa

Yuɣal-d sser ɣer tmurt

Mebɛed mi ttwaxedment kra n tezrigin n tmeɣra n uẓeṭṭa deg Uxxam n yidles Mulud Mɛemmeri deg temdint n Tizi Uzzu, anda i d-yeḍra aṭas n uhedwir ɣef uneqqel-agi seg taddart n At Hicam ɣer temdint-a, ha-t-an yuɣal sser ɣer tmurt. Teḍra tmeɣra n uẓeṭṭa deg uxxam-is n zik. Teldi tezrigt tis 11 ass-nni n lexmis 9 deg ɣuct 2018 s wudem unṣib deg taddart n Hicam. Deg usiher-a ara idummen seg 9 ar 13 ɣuct, ḥedrent ugar n 10 n lwilayat n tmurt n Lezzayer, yal ta s temsikent-is. Xas mgaradent tɣawsiwen n 80 n yinḍan i iḥeḍren ttiɛad-agi, acu kan d aẓeṭṭa i yeṭṭfen aḥric ameqqran. Akka ara naf tiqendyar n leqbayel s lesnaf-is u s yal tama n tmurt. Zyada ɣef wanect-a, llant-d temsikniyin n tinḍi-nniḍen, yecban afexxar, lfeṭṭa, tament,…atg. Am wakken i yella usnuzu s ubuddu n sin yimyura-agi : Merriche akked Nait Abdellah. Llan-dn diɣ, isaragen, amezgun akked ccna. Ma d iswi n tmeɣra, tenna-d yiwet gar yimsuddesen : ‘’Nebɣa ad nesselmed lḥirfa-agi i tsutwin i d-iteddun imi aẓeṭṭa d ayen i aɣ-d-ǧǧan yimezwura d lamana. Xas ulamma teṣɛef teswiɛt ideg i nella, meɛna neckunṭeḍ deg tẓerbit-nneɣ u nedda d lweqt-nneɣ’’. Ma ɣef umgarad yellan gar tezrigin yeḍran deg temdint n Tizi Uzzu akked tid i d-yellan deg taddart n At Hicam, yenna-d yiwen yimḍebber : ‘’Yemgarad aṭas. Dagi deg Wat Hicam xir. Dagi, ttasen-d wid teɛna temsalt, wid yebɣan ad walin neɣ ad aɣen, mačči am Tizi, win tufiḍ yekcem u yerna mebla lmeqsud. Ula d asenzi, deg Wat Hicam i d-yettili s waṭas. Yerna, akka, ttasen-d yimerriyen ɣer taddart i wakken ad tt-issinen. Xas ulamma ulac lemɛawna-nni n zik sɣur wid teɛna temsalt, meɛna nexdem sw wayen nesɛa, ayen iwumi nezmer’’.

Hocine Moula

0