Par DDK | 20 Aout 2018 | 980 lecture(s)

Xerrata

Kraḍ n yimettanen seg yiwet n twacult

Tamentilt n lmut ur telli d yiwet, akken qqaren At zik '’tamettant s ssebba, lehwa s usegna'’. Seg tmentilin-agi, ad nebder tin n yisehwa (accidents). Ineggura-a, d igiman n yimdanen i neqqen yal ass deg yiberdan, am wid yeḍran ass n 14 di ɣuct yezrin, di tdayṛa n Xerrata. Asaru, yebda s yiwen n usehwu di tnezzayt n wass, akken i aɣ-d-wwḍen yisallen sɣur uḥeddu aɣarim ( Protection civile ), asehwu-a yeḍṛa ɣef 8:45 deg ubrib n Draε Lqayed i yeggugen s 70 n yikilumitren ɣef Bgayet, deg taddart n Tarwa n Faḍel. Ssebba-s d accaḍ n yiwet n tkerrust Peugeot 306. Taneggarut-a, llan deg-s sḍiṣ n yimdanen, kṛad deg-sen mmuten imir-n, gar-asen taqcict n ukuẓ n yiseggasen, llufan amectuḥ n 11 n wayyuren akked nanna-tsen mm 65 n yiseggasen. Ma yella d wid-nniḍen i yellan yid-sen jerḥen, yerna yiwet deg waddad ur nessefraḥ. Widak-agi, ttwawin s lεejlan ɣer sbiṭar n Xerrata. «Abrid-agi yellan gar Xerrata d Ṣtif, ur yesliḥ ara, yeččur d ṭṭurnat, yerna ur yettwaxdem ara akken ilaq». I aɣ-d-yenna yiwen umezdaɣ n Xerrata. Ad d-nesmekti d akken ɣef 14:50 deg yiwen n was, yeḍṛa-d usehwu-nniḍen, yerna deg yiwen n umdiq. D akamyun ameqqran n FAW, i inehher yiwen n urgaz n 46 n yiseggasen i d-yusan seg Ṣtif. Seld mi yesruḥ amnekni ( équilibre ), ihuza snat n tkeṛṛusin (4×4) n yijaḍarmiyen, yiwen n ufurgu n tumnayt i yellan yeḥbes akked d sin n yirgazen. Asehwu-a, yessegla-d 8 n yimejraḥ, gar-asen kṛaḍ n yijaḍarmiyen. D aya i yeǧǧan imezdaɣ n Draε lqayed ḥaren seg temsalt-agi, tekcem-iten tugdi ɣef warraw-nsen ladɣa. Γer taggara, ad nbed ɣef wawal n yiwen ilemẓi i d-yennan: «Neεya deg ucekti n yal ass. A win yufan yal yiwen ad yessugen iman-is deg umkan n yimawlan n wid yemmuten, imir-n ad yili xersum uḥader».

K.K.

0