Par DDK | 20 Aout 2018 | 764 lecture(s)

TUBIRET - Asmekti n temlilit n Ṣsumam

D tajmilt i ucennay Salah Sadaoui

I lmend n usmekti n temlilit n 20 ɣuct 1956, ihegga-d Uxxam n yidles Ali Zamoum n Tubiret, s tallelt n Umussu asddukklan n tama-a, ahil d amerkanti i d-yellan d tajmilt i Salah Sadaoui. Tebda tejmilt-agi, iḍelli n ssebt 19 ɣuct 2018, deg uɣerbaz Boubi Ali n tɣiwant n Ahnif deg tmeddit n wass. Dɣa ɣef 15h30, tella-d tulya tunṣibt n leqdic-agi, s terbaɛt n yiḍebbalen akked terbaɛt n ccḍeḥ sɣur Itran n Ali Zamoum, i ixeddmen yiwet n zzedwa igerrzen dayen kan. Syin akin, d beddu n temsikniyin yerzan imuhal d tudert n umjahed d ucennay ameqqran Salah Sadaoui. Aṭas n yimagraden n tɣamsa d tdiwenniyen yexdem i d-yettwasneɛten, ɣer tama n tudert-is d yimuhal-is akked tin n tesfifin-is...atg.Tella-d diɣ temsizzelt n usuneɣ i warrac s usentel-agi “Mi ara teddukkel tezlit akked tẓuri”. Ma d iswi n temsizwert-agi, d asebɣes n yinaẓuren n tama-agi i usnulfu d usefti deg tẓuri. Seg 17h00 n tmeddit, yella-d usarag sɣur Mass Abdelkader Bendaamache, aselway n Useqqamu aɣelnaw n tẓuriwin d tsekliwin, i d-yewwin awal ɣef tudert d yimuhal n ucennay-agi. Deffir-s kan, llant-d tnagiyin sɣur ddeqs n yicennayen yellan d imeddukkal n Salah Sadaoui, gar-asen: Kamel Hamadi, Akli Yahyaten. Ma ɣef 19h00 n yiḍ, tella-d tmeɣra n ccna meqqren, ideg i d-cnan ddeqs n yicennayen n Tubiret tizlatin n Salah Sadaoui. I wass-agi n letnayen 20 ɣuct 2018, ad ikemmel wahil deg Uxxam n yidles Ali Zamoum n Tubiret. Yebda wahil ɣef 08h00 s yiwet n temsikent meqqren yerzan tagrawla tazzayrit s umata. Ad yili usersi n tmeqqunt n yijeǧǧigen uqbel ad yezgen wass, ɣef uẓekka n ucennay-agi deg tmeqbert n tɣiwant n Ain Benian. Ad tili diɣ tirza ɣer usalay n umjahed n Riad El Feth i lfayda n yinaẓuren, imjuhad d warraw n ccuhada. Ma i tmeddit-a ɣef 20h00, ad tili tmeɣra n ccna swayes ara tessali tejmilt-agi n ucennay ameɣras Salah Sadaoui. Am wakken daɣen ara fken tlata warrazen i yimuhal-nni n usuneɣ i d-yellan iḍelli deg Ahnif. Yella deg wahil n tejmilt-a, asenɛet n yiwen n usaru ɣef tegrawla tazzayrit. Ɣer taggara, ad d-nesmekti d akken leqdic-agi, yessuddes-it-id Uxxam n yidles n Tubiret, s lemɛawna n Tiddukkla “Imeddukkal n Salah Sadaoui” akked Useqqamu aɣerfan aɣiwan n Ahnif...atg.
Ghani Amazigh

0