I lmend n tmeɣra n taggara n useggas aɣurbiz, tefka, ddurt iɛeddan, tddukkla Summam Aqbu arrazen i yinelmaden i d-yufraren deg ukayad n BAC. Deg temlilit-a, diɣ, fursen yimsuddsen i wakken ad snemmren tanelmadt Lisya Benali i d-yewwi 20/20 deg tmaziɣt. D tanelmadt n taddart Iɛezzunen, yeqqaren deg tesnawit Debbih Cherif n Uqbu. D tikelt tamezwarut deg umezruy di tmurt n lezzayer ara tuɣal tejmilt i unelmad i d-yewwin agemmuḍ deg yikayaden n tutlayt tayemmat di tmurt n leqbayel. Aya mebla ccek, d ayen ara yernun di ccan n tutlyat tayemmat , d asurif ɣer sdat. “Ferḥaɣ aṭas aṭas imi wwiɣ arraz-agi, xas akken ferḥaɣ asmi i d-fɣen yigemmaḍ n BAC imi i d-yedda yisem-iw, maca lferḥ n wass-a yugar-it, imi di tutlayt-iw i deg i d-ufrareɣ, wa ad snemmreɣ aṭas aṭas amyaru n teqbaylit Amar Mezdad i yi-d-yuznen arraz-nniḍen i ɣef ur bniɣ ara ’’, i d-tenna tnelmadt Lisya . War ccek , azal i fkan yimḍebbren d yimɛinen n tddukkla Summam Aqbu, ad yesnerni di lebɣi n yinelmaden, wa ad d-yejbed lwelha-nsen ugar i wakken ad d-ttifriren yal aseggas deg yikayaden n tmaziɣt deg yiswiren yemxalfen. Ar taggara, ad d-nesmekti iɣerbazen i d-yufraren aseggas-agi di lwilaya n Bgayet ama di BEM ama di BAC d wid anda inelmaden i sɛeddan akayad n tmaziɣt.
B. Benhamouche