I lmend n useqleɛ n teẓrigt tis snat n umsizwer n tullisin, d tajmilt i Lmulud At Mɛemmer, tger-d Tddukkla tadelsant Adrar n Fad tiɣri i tikkin i wid akk yettarun, ma bɣan ad d-aznen ayen i d-snulfan d taqsiḍt, ad mḥizwaren i yimeḍqan imezwura. Ayen yerzan asentel n tullist, am teẓrigt tamenzut dɣa, ad yeqqim d ilelli, akken yal yiwen ad yizmir ad d-yefk ayen yelhan deg-s, ad yeẓwer deg wanda yezmer ad yeẓwer. D acu, usant-d kra n tewtilin ur nlaq ara ad yettu yiwen send ad yazen tullist-is. Gar-asent teɣzi n tullist ur newwi ara ad tfel akkin i 10 n yisebtar s talɣa A4, tasefsit n tira Times New Roman 12. Ma ɣef uceyyeɛ, llan sin wallalen. Ama s ttawil aqbur ɣer tansa-a: Tiddukkla tadelsant Adrar n Fad Cidex N° 03 BP 105 Ayt Smaɛel 06044 Bgayet. Neɣ s ubrid aliktrunan ɣer tansa-a n umayl: [email protected]. Aya, send 15 deg duǧember 2018. Imi ẓran yakk amek i d-tella teẓrigt tamezwarut, ideg ttwajerrden 13 n yimekkiyen, mi akken ur ḥḍiren wid i d-yufraren, bɣan yiɛeggalen n tddukkla-a, ad d-sbeyynen ugar asaḍuf amatu n umsizwer-a. Imir-nni dɣa yettunefk yiwen n warraz kan i umaru ilemẓi Akli Muhubi. « Nebɣa ad tif tezrigt-a s waṭas tin yezrin, ad yili daɣen umaynut ijebbden deg wayen ara d-awin yimura-nneɣ ilemẓiyen », i d-yenna yiwen n uɛeggal n Tddukkla tadelsant Adrar n Fad. Ad d-nesmekti d akken yebḍa umsizwer-a ɣef kraḍ n yimecwaren: Amezwaru d tiɣri i tikkin deg unebdu. Wis sin, d aktazel d tɣuri n yiḍrisen sɣur teseqqamut seg duǧember armi d meɣres. Amecwar aneggaru, d tikci n warrazen i kraḍ n yimenza i lmend n tfaska tansayant n tmedyazt, d tajmilt i Lmulud At Mɛemmer.
M. K.