Aḥric 8
Azekka-nni, tekker-d sdat lawan n tnekra n yiyuẓaḍ seg yiḍes, mi akken twala arrac-nni ṭṭṣen i talwit am tγawsiwin yersen, terna tezweγ tuli leḥnak-nsen, yennecraḥ wul-is, tessusef ifassen-is, tesself-asen s weḥnucceḍ γer sdat, γer deffir, tenna daγen i wul-is: ‘’Tagi d tacriḥt yerna d tidet’’. Tejbed-d Ḥmiṭuc s yifassen-is rqiqen am tsegnatin, teddem-it, tessekcem-it γer yiwet texxamt n yiwtal yellan d tilemt, terra-d fell-as tawwurt. Yezmer ad yessaked γer berra, acku taxxamt-nni tesεa acebbak n ugeṭṭum, maca ad isuγ akken ira, ulac anwa ad as-d-yeslen. Tuγal γer Duduc, tetthuzzu deg-s, tettεeggiḍ fell-as, teqqar-as: ‘’Kker syin a tukrift n yifassen, a ssenğaq n at laxart, agem-d aman seg lbir, sseww-d i gma-m-ihin yellan deg texxamt n yiwtal ayen ad t-yerren d azuran akken ad afent deg-s tuγmasiw d acu ara γeẓẓent’’. Γas akken tserreḥ Duduc d imeṭṭi n tugdi d uḥdiqer n tasa tageswaḥt, maca tewwi-as-d tegnit ad taγ awal n teryel tamcumt; afran ur yelli. Teryel, tettak-as i Duduc icelman kan d wayen d-igerrin seg wučči, acku telha-d d Ḥmiṭuc, tesserwa-as lewqam d tẓidanin akken ad iqebbi ad t-tečč d amezwaru. Yal tanekra n wass amaynut, tdellu γef Ḥmiṭuc, tessutur deg-s ad yessufeγ taḍadect-is seg texjiḍin n ucebbak-nni ugeṭṭum γer berra akken ad t-teṭṭef, ad tẓer ma yewwi-d iman-is deg tuzert d taẓayt. Ḥmiṭuc, iger tamawt, ifaq-as txuṣṣ deg yiẓri, yerna yufa dinna yiwen yiγess, yal mi ara terzu fell-as, d win kan i as-d-yessenεat, yesferfud-as-d yis-s s ifassen-is, nettat γur-s amzun d taleṭṭaṭ-is i d-teṭṭef, tettγil-it yeqqim kan am uγanim. Akken iεedda wayyur, wwḍen-as waman i teryel γer temgerṭ neγ yewweḍ-as rrebg γer tagust-is, d ayen ur tezmir ara ad ternu timerğa, tenna-as i Duduc: ‘’Ɣas awi-d aman a Duduca! Akken ira yili Ḥmiṭuc, ad yuzur neγ ad yiṛqiq, tura yewweḍ-d wass-is, azekka ad t-uqmeγ d timecreṭ, ad t-zlu&gamma,; ad t-azu&gamma,; ad d-nefqeγ deg-s war cceḥḥa, ad t-gezreγ s tussda, ad kkseγ yis-s aqbur’’…Tettkemmil
Seg Kabyle.com