Par DDK | 20 Aout 2018 | 1099 lecture(s)

At Smaεel

Tuɣal tuččit n yiselman d amahi!

Seg timsal iɣef yezga umdan yettḥadar, d tazmert-ines. Daymi yezga ixeddem ala ayen ilaqen i wakken ad tt-yehrez. Gar waddal d yiḍes, lmakla, tesεa azal meqqer di temsalt-agi. Lameεna taneggarut-a, akken i d-tettak tazmert, i tezmer ad d-tili d ssebba n waṭṭan. Yerna, ayagi, ḥsan yis-s akk medden, ladɣa di tallit ideg nettidir. D ayen i yeǧǧan imeẓdaɣ n taddart n Tala Ɛta deg At Smaεel, ttcektin akken ma llan, yerna zeεfen aṭas imi mazal llan yimdanen i d-yettaɣen iselman ixeṣren i d-yettelḥaqen ɣer taddart-agi. « Wehmeɣ deg win ad d-yaɣen asardin-agi, ur yettugad ɣef tezmert-is, neɣ d tin n warraw-is. Yerna ilaq ad nili akkit mgal, acku ayagi yeεna-aɣ merra». I d-yenna yiwen n urgaz n taddart-agi. Imi d tazmert i d-ikecmen deg unnar, ur ssusmen ara Wat taddart ɣef uɣbel-agi, imi aṭas deg-sen i yemsefhamen ad ssiwḍen tamsalt-agi i uselway n tɣiwant i wakken sya ɣer sdat ad yili ussefqed (contrôle) i wid yesnuzun iselman-agi. Tugart imi ddeqs deg-sen ur nettqadar iṣudaf n tezdeg d uḥraz. Ɣef usentel-agi, tenna-aɣ-d yiwet n tmeṭṭut: « Ufan iman-nsen, ulac win i ten-yettεassan. Ttawin-aɣ-d lḥut d aqdim, acku ttaǧǧan-t almi tuli ssuma-s di ssuq i wakken ad t-id-ssufɣen. Ilaq ad dduklen yimezdaɣ i wakken ad d-afen tifrat ». Ɣer taggara, ad d-nesmekti d akken tamsalt-agi, ur telli d tin n yiwet n taddart neɣ snat. Aɣbel-agi, ur yelli d amaynut, yella deg waṭas n tuddar ladɣa, tigad n udrar. Akken ssaramen yimdanen, ilaq wid teεna temsalt, ad walin deg waya s lemɣawla.
K. K.

0