Accueil Tamazight Yenqes lḥers amacemma

Afalu n Xerraṭa

Yenqes lḥers amacemma

1114
- PUBLICITÉ -

Ahat ɣur merra inehharen n waɣir n Bgayet, amḍiq akk i ttkukrun i tenhert d abrid n ufalu n Xerraṭa deg ubrid aɣelnaw wis 9, i d-yezgan gar temdint-a i d-nebder d Lberj n Mira, taɣiwant n Tsexriwt. Ula d asiwel, fkan-as seg waṭas-aya tiɣri n « Afalu n lmut ». Aya, imi yal mi ara tkecmeḍ s ukerrus deg-s, mačči d amihi (danger) kan, neɣ sin, i ak-yeṭṭafaren deg teɣzi n wazal n 7 n yikilumitren i ixeddem. D timrawin dɣa n yimdanen i yettmettaten din yal aseggas, seg wayendin d isehwa n tikli i n-iḍerrun. Daymi kkren yinesdabuyen idiganen sqelɛen asenfar n ussuseɛ d ureqqeɛ n ubrid n Ɛecba, i wakken ad yili d asellak i usenqes seg umxudneq d yisehwa ineqqen i d-yettilin deg ufalu-a aqbur, i yettwabnan deg yiseggasen n 1980. Iseggasen-a ineggura, tqeddec dinna tkebbanit taṭurkit akked ETRHB Heddad i t-yeṭṭfen, armi dayen thegga yiwen n uḥric seg-s, i yettwaldin ass 1 n yulyu yezrin. Deffir waya, ɣef wawal n yinehharen s timmad-nsen, yettban-d zun yenqes am acemma uḥras deg ufalu-a, abeɛda deg umezwaru-nni mi ara d-taseḍ si Xerraṭa ɣer Lberj n Mira. Imi winna ar tura, seqdacen-t ala wid i d-yettasen si Xerraṭa. Wamma wid yettruḥun si Lberj n Mira, yal mi ara kfun afalu wis sin, ad zegren dindin ɣer ubrid amaynut n Ɛecba, i d-gant tkebbaniyin-a i d-nebder. « Ɣas mazal ur yenqis ara umihi deg wayen yeɛnan isehwa, maca xersum yekfa ddiq deg yiwen n ufalu. Nettraǧu kan ad yekkes merra usenfar n ussuseɛ n ubrid n Ɛecba akken ad tserreḥ tikli s tidet », i d-yenna yiwen n unehhar seg usamar n Bgayet. Ayen yehwan i yinehharen deg ufalu amaynut, d mi yella yiwen n yizirig n tikli deg-s, meḥsub ala wid yettalin i t-yessemrasen, rnu tnuḥ xilla tafat deg-s, ad as-tiniḍ deg wass i telliḍ.

- PUBLICITÉ -

M. K.

- PUBLICITÉ -