Par DDK | 27 Aout 2018 | 822 lecture(s)

TAWRIRT MUSA WAƐMER - Asalay n Matoub Lounes

Ad yebdu lebni n usenfar-a, deg ussan i d-iteddun

Ɣef wakken i d-yeffeɣ yisalli deg APS, yeqbel uselway n tegduda asenfar n lebni n usalay n Matoub Lounes i as-tedleb tselwayt n Lsas Matoub Lounes.

Ɣef wanect-a, dɣa, i temlal Malika Matoub, s yisem-is d taselwayt n Lsas Matoub, akked Mass Mihoubi, aneɣlaf d yidles, ussan iɛeddan, i wakken ad tt-id-ixebber s yisalli-agi. ‘’Yeqbel uselway n tegduda, Abdellaziz Bouteflika, asuter n usenfar u yefka iwellihen i wakken ad yili udrim ilaqen akked lmendad i utbaɛ n lebni n usalay adelsan n Matoub Lounes ara iɛiwnen ɣef useḥbiber n uktay n unaẓur, i inuḍḥen ɣef tneflit n ccna d uẓawan amaziɣ’’. Ɣef wakken i d-yenna Mihoubi, ula d Malika Matoub tefreḥ s tririt n uselway n tegduda i teḥseb ‘’D aseḥbiber ɣef tgemmi, idles akked tẓuri. Dayen ara yesnernin ccan n yinaẓuren’’. Yella-d lebɣi n lebni n usalay n Matoub Lounes acḥa-aya, ɣef leḥsab n Malika, uletma-s n uɣewwaɣ. ‘’Azal n 12 n yiseggasen-aya segmi tettazzal twacult Matoub akked Lsas Matoub ɣef lebni n usenfar-agi. Aya, yella-d deg yiṣudaf imaynuten n 2012 i yeɛnan tiddukkliwin, anda i zemrent ad xedment isenfaren yecban wigi’’, i d-tenna. Asuter n lebni n usalay n Matoub Lounes, i tikkelt-nniḍen, yella-d deg usmekti wis ɛecrin n tmettan n Matoub ass-nni, 25 yunyu 2018, deg taddart Tawrirt n Mussa Waɛmer. Ma d asersi n usuter-a, yettwasers deg waggur n maggu 2018 deg tneɣlaft n yidles. Sin wagguren umbeɛd, tella-d tririt n uqbal-is sɣur aselway n tegduda. Ɣef leḥsab n yisallen i aɣ-d-yewwḍen, ad bdun lecɣal n usalay-agi deg ussan i d-iteddun. Ad yili daxel n uɣerbaz amenzu, Mbarek Matoub, i d-yezgan tama n uxxam n Matoub i yettwanɣan ass n 25 deg yunyu 1998 deg Tala Bunan. Am wakken yettwaṭṭen azal n 15 n wussan deg waggur n cutember 1994 sɣur terbaɛt n GIA, ɣef wakken yeffeɣ wawal. Yettwaserreḥ-d, imi i d-tekker tmurt n leqbayel tettnadi fell-as deg tẓegwa. Yettwawet, diɣ, s rrsas n yiǧadarmiyen deg waggur n tuber 1988 deg tama n Micli. Ad d-nesmekti d akken d axxam n Matoub Lounes i tebɣa niqal uletma-s ad t-terr d asalay, acu kan asenfar-agi, tugi-t tmeṭṭut-is Nadia, u teḥbes-as-t deg ubrid n uheggi-ines.

Hocine Moula

0