Par DDK | 27 Aout 2018 | 512 lecture(s)

Aṭṭan n choléra

Ugar n 40 n yimdanen i yeṭṭfen lehlak-a

Ugar n 40 n yimdanen i yeṭṭef waṭṭan n choléra, ussan-agi ineggura, deg kra n lwilayat n tmurt n Lezzayer. Ɣef lezḥzab n yisallen i d-yeffɣen taggara-a, azal n 46 n liḥalat i iḥuza waṭṭan-agi deg 4 n lwilayat-agi : Blida, Tipaza, Lezzayer tamanaɣt akked Tubiret. Zyada ɣef wanect-a, llan ugar n 130 n yimdanen ttwucukken s lehlak ; ha-ten-in ttwaɛussen. Ma nwala amḍan n wid yuḍnen, ad naf d lwilaya n Blida i yettwaɣen aṭas s 22 n yimuḍan, syin d lwilaya n Tipaza s 11 n liḥalat, xemsa-nniḍen deg Lezzayer tamanaɣt, akked 3 n yimdanen n Tubiret, deg temdint n Ɛin Bessam. Yegla-d waṭṭan-a, s lmut n yiwet n tmeṭṭut deg lwilaya n Blida. Am wakken i d-yella, diɣ, taggara-a, lehlak n yiwen umdan s waṭṭan-agi n choléra deg lwilaya n Mdiyya. Acu kan, skaddben isalli-agi srabes n tneɣlaft n tdawsa. Ma d ssebba n lehlak-a, mazal ur d-iban s wudem unsib, xas ulamma wekkden-d wid teɛna temsalt d akken ur d-yekki ara deg waman. Ihi, ɣef leḥsab-nsen, yezmer ad yili yusa-d deg lxedra akked lfakya, imi zeddigit waman n tbernint, ɣef wakken i t-id-nnan. Ɣef leḥsab n wulɣu n tneɣlaft n tezmert, lehlak-a, ur yemmiɣ ara s waṭas, llant kan kra n liḥalat i d-ibanen sya u sya. Ɣef wakken i d-yewweḍ isalli, amur ameqqran n wid yeṭṭef waṭṭan-a, ttekken-d deg yiwet n twacult. Meḥsub lehlak-a yettḥaz kra deg yiɛeggalen n twacult, ayen yeǧǧan taslaḍt tettkemmil i wakken ad d-afen assaɣ yellan gar waṭṭan-a akked twuculin i t-yeṭṭfen. Ladɣa imi mazal igemmaḍ n teslaḍt ur d-ffiɣen ara s wudem unsib ar tura deg Usudu Pasteur n Lezzayer tamanaɣt. ‘’D kra kan n liḥalat sya u sya. Lehlak-a, yella-d deg rebɛa n lwilayat n tmurt : Tipaza, Lezzayer tamanaɣt, Blida akked Tubiret. Wid yeṭṭfen aṭṭan deg Tipaza, d iɛeggalen n yiwet n twacult anda ababat ixeddem deg Blida. Aql-aɣ la nettnadi ɣef wassaɣ i izemren ad yili gar twaculin ihelken akked waṭṭan-agi’’, i d-yenna Dr Fourar, anemhal deg tneɣlaft n tdawsa, i AFP. Ikemmel yenna : ‘’Ma ɣef temsalt Ɛin Bessam, anda llan tlata n yimuḍan n yiwet n twacult, ha-t-an yeɣba lehlak dinna, ulac liḥala tamaynut’’. Ma ɣef ssebba n waṭṭan, iwala Dr Fourar d akken yezmer ad d-yekk deg lxeḍra neɣ deg lfakya ur nettwared ara akken ilaq. Akken yebɣu yili lḥal, tekcem tugdi imdanen, ladɣa imi i d-yella leɛḍil deg yisallen ɣef lehlak-agi sɣur wid teɛna temsalt, ladɣa taneɣlaft n tezmert neɣ n waman. I wakken ad seḥbibren yimdanen ɣef tezdeg n waman n tissit akked yiguma, yella ttawil, ɣef wakken i ttwessin yimejjayen. Ihi, ilaq ad rennun snat n tquddurin n waman n Javel i litra n waman n tissit, u ad as-ttarran ciṭ n waman n Javel i waman n tarda. Ad d-nesmekti belli aṭṭan-agi n choléra, iban-d tikkelt taneggarut deg useggas n 1986 anda i t-ṭṭfen azal n 4 500 d amdan.

H. M.

0