Par DDK | 27 Aout 2018 | 660 lecture(s)

Iɣram

Tessuli tfaska n tmedyazt

Seg wass n 17 armi d 20 ɣuct yezrin i temmug deg tɣiwant n Iɣram teẓrigt tamezwarut n tfaska n tmedyazt taqbaylit, d tajmilt i Mass Lewnis Aɣrud. Ulamma aṭas ur neḥsi s ttiɛad armi d akuden ineggura, ttwajerrden ddeqs n yimekkiyen i d-yusan ɣer temlilit, abeɛda ma neẓra aseggas-a kan i d-tlul. Deg wayen i d-yellan deg wahil i yebdan seg wass amezwaru, seld awalen n teldayt n yimḍebber n tɣiwant n Iɣram d uselway n tddukkla timheggit, tɛedda-d talilit i usayes, ad d-tawi yiwet n tezlit. Syin, deg teɣzi n wayen i d-yeqqimen tameddit, ɛeddan yimedyazen i tedwilt n tmenna n yisefra, deffir-s d tameɣra n ccna. Deg wass wis sin, ugar n ccna deg yiḍ, tettwasuddes tuffɣa s usaɛef i taddart Ugemmun, i d-yezgan di leǧwahi n temnaḍt n Tizi Maɛli. Am wakken i d-uɣalen yiswiɛen n usiwel n yisefra sɣur kra n yimedyazen imekkiyen. Ass wis kraḍ, tella-d tirza-nniḍen i Lqelɛa n At ɛebbas deg Yiɣil Ɛli. Akkin i tmeddit, s umata tettwasenɛet-d tceqquft n umezgun, tella-d tmenna n yisefra. Ma deg wass aneggaru, tella-d tirza i tmeqbert n yimeɣrasen, syin d tasfugla n tikci n warrazen. Ayen yerzan imeḍqan imezwura i d-yeffɣen ɣer taggara n umsizwer d temlilit, yettunefk warraz amezwaru i umedyaz Buɛlam Md Arezqi. Arraz wis sin isaḥ-d i ucennay Salim Kahin. Ma d arraz wis kraḍ, tewwi-t Massa Nura Ḥemmudi. Ɣur kra n yimedyazen, teɛdel amcemma teẓrigt-a tamezwarut ulamma yefreɣ deg-s wahil. Imi ula d asarag ɣ akked umunulug i llan tturaǧun, ur muggen ara ɣer taggara. Maca d ayen i izemren ad yili d asebɣes i uwenneɛ n yiqeddicen ugar ɣer sdat.

M. K.

0