Par DDK | 27 Aout 2018 | 949 lecture(s)

Cwiṭ seg tmucuha n leqbayel

Ḥmiṭuc d Duduc deg teẓgi n ṭṭlam

Aḥric wis 9

Nnaγ a yemma Guraya tegzem tasa n Duduc tameγduṛt, wali amek tekfa fell-as ddunit d yiẓri-s yugaren tiregwa isaffen mi ara d-ḥemlen! Duduc tettmeğğid, teqqar: ‘’Anda tellam a ṣṣellaḥ d lawliyyat n tmurt-aggggi? Ssufγet-aγ-d aha ttxil-wat seg yimi n yizem! deg leεnaya-k ay aεessas n tala, a baba Udris d wahin d tahin ma ur tekfim fell-aγ ccedda am tagi! A nnaγ a ẓẓher-nneγ, smenyafeγ lemmer i d aγ-ččin wuccanen mi akken neṭṭeṣ deg teẓgi, meqqar ad nenger deg sin γef yiwet tikkelt, ulac anwa ad d-yegrin deffir wayeḍ ad yeḥdiqer!’’. Teryel, tesla-as mi tesḥussuf, tenna-as: ‘’Aha tura d ayen ur ttberriḥ ara, d taruẓi kan i tettruẓuḍ deg uqerruy-im γef ulac, gma-m ččiγ-t, ččiγ-t! Ihi ur yelli d acu i d-yettawi umeğğedinem’’. Lkanun ideg tessewway teryel annect n tesraft, yerna yugar lbir deg teγzi. Yesεa yiwet tewwurt n wuzzal, mi ara tt-temdel ifeṭṭiwej mačči yezmer ad d-yeffeγ γer berra. Teddem-d snat tsebbalin-nni n waman timecṭaḥ tesεa qqnent s yimurar γer yiwet n tassara n usγar aquran, tεebba-tent i Duduc γef tayet-is si sdeffir akken yettbibbi uγyul acwari-s, tuzen-itt ad teččar tuggi yis-sen. Duduc, tuγ awal-is s tmara, tetteddu tesnuzgum, tesseqdac allaγ-is amek ad d-taf ttawil n unsar n yiḍarren-is d usemneε n gma-s yerna s uγiwel. Tenna-as teryel: ‘’Yessefk ad nezwir deg usewwi n uγrum, lkanun ssaγeγ-t yakan, arekti daγen yettwaεjen’’. Teṭṭef Duduc seg tfettust-is, tettmekkin-itt s anida i d-ineddeh ujajiḥ n tmes, teqqar-as: ‘’Massi, massi times, ssaked ma yeḥma lkanun akken ad sserseγ aγrum ad yeww!’’. Nettat d Duduc i d-tewwi gar wallen-is, yeffeγ-d useqḍiḍ-is fell-as, ira wul-is ad tt-teknef, sakin ad tt-tečč d tamezwarut, maca Duduc tfaq-as d acu i as-tettheggi, tuγal tenna-as: ‘’Ur ẓriγ yakk amek zemreγ ad ṣuḍeγ times, yella kra n ttawil tessneḍ akken ad wwεuγ, ad smendgeγ isγaren deg ṭṭaq-agi ?’’... tettkemmil

Seg kabyle.com

0