Par DDK | 27 Aout 2018 | 958 lecture(s)

Tasexriwt

Asizdeg n Ucercur n Tzebbucin

Yal yiwen amek yesεedday imuras, wagi iḥemmel ad yerzu ɣer yilel, ma d wayeḍ yettaf iman-is ugar deg ugama. Ad t-tafeḍ yettfaras ccbaha d tsusmi n teẓgi. Di taddart n Lberj Mira, taɣiwant n Tsexriwt, Acercur n Tzebbucin d tahuski ur nesεi tilas. Imi i d-yemlal deg waṭas n yiniten. Gar tzegzewt n ugama, aman iṣemmaḍen i d-yettcercuren ttreqriqen am lwiz. D ayen i yeǧǧan ilemẓiyen n tɣiwant-agi rezzun ɣer dinna i wakken ad kksen ɣef wul-nsen, yerna sucufen dinna deg unebdu-agi. Ayen i d-yesbeggnen d akken arrac-agi ḥemmlen amḍiq-nni, yerna ttḥadaren-t, d ccɣel i xedmen ass n 22 di ɣuct yezrin. Imi ɣas ma yella d ass wis sin n lεid, meεna ddukklen ddeqs n yimezdaɣ gar-asen i wakken ad berzen acercur-agi. «Ilaq ad yeqqim umazzer-agi zeddig, imuras n warraw-nneɣ sεeddayen-ten-id dagi. Ihi ula d nekni ilaq ad t-neḥrez», i d-yenna yiwen ubabat. Ma d arraw imecṭah, umren atas s ccɣel-agi mi ufan tagnit i usizdeg, taḍsa d tturart.Yenna-aɣ-d yiwen n uqcic s ucmummeḥ: «Yeεǧeb-iyi lḥal aṭas ass-agi, armi d lmuḥal ad t-ttuɣ. Limer ufiɣ, ad d-yettuɣal yal ass, ulac win ur nḥemmel ara ccbaḥa d tezdeg’’. Ihi akken i d-nnan yimezdaɣ: ‘’A win yufan ad ṭṭuqtent twiziwin gar medden i usizdeg n tuddar’’.

K. K.

0