Par DDK | 27 Aout 2018 | 926 lecture(s)

IRJEN - Tazrigt tis 4 n tmeɣra n yidles akked umezruy

Tella-d ddurt iɛeddan, ɣef teɣzi n 5 n wussan

Gar 16 alamma d 20 ɣuct 2018, i d-tella tezrigt tis rebɛa n tmeɣra n yidles akked umezruy, i d-yettilin yal aseggas deg tɣiwant n Yirjen. Yebda usiher-agi adelsan, ass-nni n lexmis iɛeddan 16 ɣuct 2018, anda i d-tella tesfugla n tulya tunṣibt n tezrigt-agi tamaynut n tmeɣra-agi. Tessuli ahil-is ass-nni n letnayen yezrin 20 ɣuct 2018, s tesfugla n taggara, i d-yellan deg tmeddit n wass maḍi. Ma d ahil i d-yeḍran ɣef teɣzi n xemsa wussan-agi n tmeɣra, yella-d d anesbaɣur, gar temsikniyin d yisaragen akked usenɛet n yisura...atg. Yebda leqdic swudem unṣib, ass-nni n lexmis yezrin ɣef 11h00 n uzal, s tejmilt meqqren i iwellafen (photographies) n temnaḍt n Larebɛa Nat Yiraten, gar-asen: Mbarek Djehel, Rachid Hamiti, Idir Grib, Fehat Serbouh, Kebbab Mèziane, wigi akk ḥerdren tajmilt-agi i d-yellan ɣef ddemma-nsen, ma Djouaher Belaid akked Djouher Chabane, yečča-ten wakal. Maca uqbel annect-agi, tella-d tulya tunṣibt n tezrigt-agi tis ukkuẓet ɣef 10h00 n ssbeḥ. Di tmeddit n wass ɣef 18h00, yella usenɛet n usaru “I tlelli” s teqbaylit ɣef teɣzi n 52 n ddqayeq, i d-yewwin awal s umata ɣef wazal n temnaḍt n Larebɛa Nat Yiraten deg tegrawla tazzayrit. Ikemmel wahil azekka-in n lǧemɛa 17 ɣuct 2018, deg tṣebḥit n wass, s beddu n waṭas n temsikniyin n tewllafin i icebḥen ayen din, yal timsikent s usentel-is. Ma di tmeddit ɣef 16h00, yella-d usarag sɣur mass Belkacem Haouchine, i d-yewwin awal ɣef uwellaf (photographie) n tmurt n Leqbayel deg lqern wis 19, yezzi wawal deg-s ɣef usentel-agi agejdan “Assaɣ yellan gar uwellaf akked yidles aqbayli”. Ssebt 18 ɣuct 2018, yella-d d ass wis tlata n tmeɣra-agi, yella-d deg-s usenɛet n usaru-a “La JSK 1946-1996” n umsuffeɣ Abderraza kLarbi Chérif, i yellan ɣef teɣzi n 90 n ddqayeq, i d-yewwin awal ɣef umezruy n terbaɛt n yilmeẓyen n leqbayel (JSK). Ayen i d as-yernnan sser i usaru-agi, d tillin n waṭas n yimurar iqburen n terbaɛt-agi, ɣer tama n temsikniyin-nni i yebdan ɣef 10h00 n ssbeḥ. Yella-d diɣ usarag ɣef tektut n tegrawla, ideg i d-yella umeslay ɣef tegnatin n tallit n umnekcam afransis. Asarag-agi, yella-d i lemndad-is mass Ali Feraoun akked mass Si Ouali Ait Ahmed. Ma deg wass-nni n letnayen ideg yessuli leqdic-agi, tella-d deg-s tirza ɣer temdint taqdimt “Fort National” yuɣalen d Larebɛa Nat Yiraten . Ma deg tmeddit n wass, yella-d usarag n massa Linda Ouar, ɣef useḥbiber d uḥraz n tgemmi tadelsant i d-yeqqimen seg temdint taqdimt “Fort National” di Larebɛa Nat Yiraten . Am wakken kemmlen temsikniyin-agi deg sin-nni wussan ineggura (lḥed d letnayen), ɣef teɣzi n wass, si 10h00 alamma d tameddit.

Tafaska n unebdu s tmedyazt d uẓawan

Tger-d tddukkla tadelsant “Amezyab n lehna” n taddart n Bujlil di tɣiwant n Yirjen, tikti n usuddes n tezrigt tamezwarut n tfaska “Anebdu s tmedyazt d uẓawan”. D tafaska tamaynut ara d-yernu ɣer yessetma-s i d-yettilin deg tmurt n Leqbayel yal anebdu. D tin i yetturaǧun ad tawi aṭas n ubaɣur ama i temnaḍt n Larebɛa Nat Yiraten s wuzzig ama i tmurt n Yiqbayliyen s umata. Ad tili di taggara n ddurt-agi ideg nella, ɣef teɣzi n 03 n wussan. Ad tebdu lexmis-agi sdat-nneɣ 30 ɣuct 2018, ad tessali ass n ass n ssebt, amenzu deg waggur n cutember 2018. D ttiɛad adelsan amaynut, i yetturaǧun ad yili deg taddart n Bujlil, yettabaɛen ɣer tɣiwant n Yirjen, i ibeɛden s wazal n 20 n yikilumiṭren ɣef wunẓul-asamer n temdint n Tizi Uzzu. Ma d ahil i d-yettwaheggan, ad yili d anesbaɣur, imi ad naf deg-s; timenna n yisefra, timliliyin tiseklanin, isaragen, tulsa n tmucuha, asenɛet n yisura, timeɣriwin n ccna, isikwan n tutlayin d wayen-nniḍen. Asiher-agi, yettuneḥsab d tagnit i useddukkel n yinaẓuren d usqerdec n tmussniwin d tikta gar-asen, d timilit daɣen akked wid iḥemmlen taẓuri s tewsatin-is yemgaraden (ccna, amezgun, tamedyazt...). Yetturaǧu daɣen ad ilin yimura d yimedyazen, ara ixedmen asenzi s ubuddu n yidlisen-nsen, ara d-yerzun seg ddeqs n tamiwin n tmurt n Leqbayel.Am wakken daɣen i tettuneḥsab tfaska-a, d tagnit i tuksa n lxiq d urfad n tmussni i yimezdaɣ n temnaḍt-agi n Larebɛa Nat Yiraten, i d-yefkan sin yimedyazen imeqqranen n tmurt n Leqbayel wigi d Si Muḥend u Mḥend akked Ccix Muḥend u Lḥusin.
Ghani Amazigh

0