Par DDK | 27 Aout 2018 | 909 lecture(s)

Iderginen

Aheggi n usileɣ aɣelnaw i yilemẓiyen

S tallelt n Tenmehla n yilemẓiyen d waddal n Bgayet, tettheggi-d tddukkla Oxy-jeunes i Usnerni d uḥraz n tgemmi tagamant tamezrayt n Yiderginen, i wussan-a i d-iteddun, yiwen n usileɣ aɣelnaw n yinemhalen (ambassadeurs) n twennaḍt, s uberriḥ n "Sileɣ, Rebbi, Sḥulfu, Selɣu". Ad d-tili temlilit i lfayda n tlemẓiyen d yilemẓiyen n yal tiɣmert, i yesɛan di tmeddurt gar 18 d 28 n yiseggasen. Ma d azemz, d yemmag warmud-a n uselɣu d uḥesses gar 5 d 8 cutember di tlemmast n tɣiwant n Yiderginen, i d-yezgan s wazal n 45 n yikilumitren ɣer usamar n waɣir n Bgayet. ‘’Ahat d ayen yellan d amaynut deg unnar-a n usileɣ i wid merra iḥulfan terza-aneɣ taluft, neɣ yewwi-d ad d-ɛeddin seg tirmit’’, i d-tenna yiwet n tlemẓit, terna-d: « Aneḍruy-a n usileɣ seg wid i ur ilaq ad yesruḥ hedd ». Yelha ad d-nesmekti belli gar yiswan n usileɣ am wa, amezwaru ara d-tessuddes tddukkla Oxy-jeunes, d asezmer n tzemmar n yilemẓiyen i yesseḥbibiren ɣef twennaḍt deg umussu asdukklan, neɣ i yellan deg unnar-is yakan, deg usemres n yiqeddicen d tektiwin-nsen. Ma d ayen yeɛnan ajerred n yimekkiyen, yettwaseḥbes deg wass n 23 ɣuct yezrin, akken i d-tewwi teɣbalut-nneɣ. D awellih kan ɣef wussan iɛeddan, imi tella tbedd tddukkla Oxy-jeunes i warmud-nniḍen i d-yettwaheggan deg tazwara n ɣuct. Ayen i d-ijebden tamawt d lɣiba n tutlayt taqbaylit deg yakk tinazalin i d-yettmaggan i lmend n ttiɛadat-is, am tuget n tddukkliwin dɣa. D ayen yesḥissifen, imi sɣur tddukkliwin i yewwi-d ad d-yebdu useqdec n tutlayt.

M. K.

0