Par DDK | 3 Septembre 2018 | 642 lecture(s)

Bgayet

Aṭas n medden i iruḥen d iseflan n yilel

Aṭas n medden i yettεassan ad d-yelḥeq unebdu s ccuq d ameqqran, imi deg-s i ttfaṛasen tagnit i usteεfu, ladɣa ixeddamen. Ineggura-a, seld 11 n wagguren n uxeddim d leḥṛis, ttraǧun anebdu i wakken ad awin aggur n usgunfu. Yerna amur ameqqran deg-sen, iḥemmel ad t-yesεeddi deg yilel, i wakken ad yekkes ɣef lxaṭer-is. Ilel akken i yella d amḍiq i tukksa ɣef wul d usteεfu, i yella daɣen d amahi s tidet, ladɣa i win ur nessin lesrar-is. Ṭtuqten wid iruḥen d asfel n yilel aseggas-agi di Bgayet. Wagi ur yessin ad iεum, wayeḍ ur iḥuder ara, imi ur iquder ara iṣudaf n lεum. Leḥqen-aɣ-d isallen sɣur Uḥeddu aɣarim(Protection civile) d akken ass n 26 di ɣuct yezrin, ɣerqen sin n yilemẓiyen seg Ttlaɣma, tawilayt n Mila deg yilel n Melbu. Amezwaru d (D.Y) i yesεan 29 n yiseggasen di leεmer-is i d-ssufɣen yimmsellken n Uḥeddu aɣarim imir-n imi asen-d-wwḍen yisallen ɣef 15:00 n tmeddit. Ma yella d wis sin, d (S.M) i yesεan 24 n yiseggasen. Ufan-t azekka-nni ɣef 07:25 n tnezzayt. Ad d-nesmekti d akken deg yiwen n wass, 27 di ɣuct yezrin, yeɣreq daɣen yiwen n uqcic yesεan 7 n yiseggasen, deg umḍiq iwumi qqaren " Asumat " (gar Ssaket akked Tiɣremt), di tɣiwant n Tuǧa. Amḍiq-nni, yeččur d iblaḍen, yerna ulac deg-s taεessast. Aqcic-a, yedda akked d twacult-is, usan-d seg Bgayet(Taɣzut). Ɛerḍen yimeggayen n Uḥeddu aɣarim ad t-id-selken, meεna ur ssawḍen ara. Γer taggara, ad d-nini mačči d yiwen, neɣ d mraw i yemmuten deg yilel. Ihi yelha uḥader d uzzwer n wallaɣ, akken qqaren at zik "Aḥader yugar aqader".

K.K.

0