Sendiḍelli n ssebt, amenzu deg waggur-agi n cutember 2018, i tessuli tezrigt tamezwarut n tfaska “Anebdu s tmedyazt d uẓawan”, i d-yellan deg taddart n Boudjelil, deg Larbaa Nath Irathen. D asiher adelsan i d-ilulen ussan-agi kan, maca yuɣ akk ulawen n wid yerzan ɣer dinna. Tella-d deg taggara n ddurt-agi yezrin, tebda ass-nni n lexmis 29 ɣuct 2018, temdel tiwwura-as ssebt-agi kan deffir-nneɣ. Ma d ahil anesbaɣur i d-yellan ɣef teɣzi n 03 n wussan, yella-d akka: Di tsebḥit n wass-nni n lexmis, ɣef 10h00 tella-d tulya tunṣibt n tfaska-agi. Syin akkin yella-d wawal sɣur uselway n Tiddukkla Amezyab n lehna akked imseddu n tkebbanit EMEV, i d-yellan deffir n usuddes n leqdic-agi. Deffir n yimeslayen n sin-agi n yimsuddsen, tella-d tejmilt i warrac imecṭah n taddart-agi n Boudjelil. Syin akkin, ɣef 10h30, tettunefk tegnit i tmedyazt akked ccna. Tin ɣur-s ɣef 10h45, lant-d snat n temliliyin tiseklanin. Tamezwarut, sɣur tmarut Akila Kadaoui, i d-yewwin awal ɣef usentel-agi “Hassi-Mesfesoukh, taddart anda sɛeddeɣ temẓi-w”. Tis snat, tella-d sɣur Massa Fairouz Racham, i d-imeslayen ɣef usentel-agi “ Enchantée de ton départ”. Deffir-sent kan, yella-d uskasi, ideg i d-rrant ɣef yisteqsiyen n yimsefliden. Tettuunefk daɣen tegnit tikkelt tis snat i tmedyazt akked ccna, uqbel ad yessali wahil n tsebḥit n wass. Deg tmeddit n wass, ɣef 14h00 n uzal, llant-d snat n temliliyin tiseklanin-nniḍen, sɣur Nadjib Stambouli akked Akli Derouaz, syin akkin yella-d uskasi. Ma ɣef 17h30, yella-d usarag ameẓyan s ṣṣenf n (table ronde), ideg yezzi umeslay ɣef tmedyazt taqburt akked tmirant, sɣur ddqes n yimedyazen, gar-asen: Nordine Ait Slimane, Abdenour Abdesselam, Abderrahmane Djelfaoui…atg. Ikemmel wahil deg yiḍ, dɣa ɣef 20h00, tella-d taɣuri n yisefra i d-yettwastebɛen s uẓawan aḥlawan. Aṭas n yimedyazen i d-yewwin isefra-nsen, gar-asen: Idir Bellali, Ourda Baziz Cherifi, Faiza Acitani…atg. Kfant-tt s tulsa n tmacahut akked tmeɣra n cca, ideg iɣenna Malek Kazeoui akked waṭas n yicennayen-nniḍen. Ass-nni n lǧemɛa, i d-yellan d ass wis sin n tfaska-agi, ɣef 10h00 n ssbeḥ, bdan-tt s ccna akked yisefra. Syin akkin, ɣef 10h15 , lant-d snat n temliliyin tiseklanin akked uskasi. Tamezwarut, sɣur Mass Mouloud Ounoughene, i d-yewwin awal ɣef tezlit tamirant. Tis snat, tella-d sɣur Massa Lazhari Labter akked Massa Samira Bendris, i d-imeslayen ɣef tezlit “Ḥizya”. Tella-d diɣ tmenna n yisefra i d-yettwastebɛen s lmusiga. Ma ɣef 16h00 n tmeddit, yella-d usenɛet n sin n yisura, deffir-sen kan yella-d uskasi fell-asen. Ɣef 17h30 d tasawent, yella-d usarag ameẓyan s ṣṣenf n (table ronde), ideg yezzi umeslay ɣef wamek ttwalin yicennayen d yimedyazen tizlit, sɣur ddqes n yimedyazen akked yinaẓuren, gar-asen: Nordine Ait Slimane, Karim Abranis, Belaid Tagrawla, Rabah Ouferhat…atg. Ikemmel wahil deg yiḍ, dɣa ɣef 20h00, tella-d tɣuri n yisefra i d-yettwastebɛen s uẓawan aḥlawan. Aṭas n yimedyazen i d-yewwin isefra-nsen, gar-asen: Nordine Ait Slimane, Hamid Ibri, Mbarek Guemar…atg. Ssulin leqdic-nsen, s yiwet n tmeɣra n ccna meqqren, ideg ccnan ddeqs n yinaẓuren, gar-asen: Idir Bellali, Hocine Ouagueni, Fares Chemmam…atg. Ass-nni aneggaru, n tfaska-a, i d-yellan sendiḍelli n ssebt, yella-d deg-s, ɣef 10h00 ccna akked yisefra. Syin akkin ɣef 10h15, lant-d snat n temliliyin tiseklanin akked uskasi, sɣur Mass Mohand Magani akked Mass Djaoudat Guessouma. Tin ɣur-s, tella-d diɣ tmenna n yisefra i d-yettwastebɛen s lmusiga. Ɣef 11h30 n uzal, llant diɣ snat temiliyin tiseklanin-nniḍen sɣur sin-agi n yimura: Mohamed Aziz akked Abderrahmane Yefsah, i d-yewwin awal ɣef yidlisen-nsen ineggura. Deg tmeddit n wass, ɣef 16h30 d afella, yella-d usarag ameẓyan s ṣṣenf n (table ronde), ɣef wungal amaziɣ, d wanda yeṣṣaweḍ, i d-yezdin gar ddqes n yineggalen, gar-asen: Hacene Halouan, Mohand Arkat, Hamid Bilek…atg. Syin akkin ɣef 18h30h n tmeddit, tella-d tegnit i tɣuri n yisefra sɣur qeddac n yimedyazen, gar-asen: Ahcene Mariche, Mohand Nait Abdellah, Lounes Ameziane, Slimane Belharat d wiyaḍ-nniḍen. Tella-d diɣen tmeɣra n ccna ɣef lewhi n 22h00 n yiḍ, anda ccnan ayen din n yicennayen, ad nebder gar-asen: Belaid Tagrawla, Rabah Ouferhat, Takfarinas Ferhat, Brahim Tayeb…atg. Am wakken diɣ i d-tella tesfugla n taggara, ideg fkan arrazen i wid i d-yufraren deg yisikwan i yettwaxdamen. Llant-d daɣen temsikniyin n tfelwitin n teklut sɣur ddqes n yinaẓuren, mebla ma ttuɣ asenzi s ubuddu n yidlisen i d-yellan sɣur yimura d yimedyazen. Ad nesmekti kan belli, taddart-agi n Boudjelil, tewwi yakan arraz wis xemsa n taddart tazedgant deg tezrigt n 2016. Ɣer taggara, ad nini belli d tiddukkla tadelsant “Amezyab n lehna” n taddart n Boudjelil s tallelt n tkebbanit n usuddes n tmesbaniyin tidelsanin, tidelsanin akked tussnanin (EMEV), i d-yellan deffirn usuddes n tezrigt tamezwarut n tfaska “Anebdu s tmedyazt d uẓawan”.
Gh. A.