Par DDK | 3 Septembre 2018 | 864 lecture(s)

IḤEMZIYEN Tafaska n tqendurt n leqbayel

Tekfa tezrigt tis 9 di tazwara n ddurt iɛeddan

D asiher i d-yellan deg taddart n Yiḥemziyen, gar 26 akked 27 ɣuct-agi iɛeddan. D tafaska n tqendurt n Leqbayel i d–tettheggi yal aseggas tiddukkla tadelsant “Tagmat” n taddart-agi n Yiḥemziyen, yettabaɛen ɣer tɣiwant n Yilula Umalu di Buzgan.

D tafaska i d-yuɣalen aseggas-a deg tezrigt-is tis ttesɛa (09), tedda ɣef teɣzi n 2 wussan, imi tebda ass-nni n lḥedd 26 deg waggur n ɣuct, deg tasebḥit n wass, temdel tiwwura-s azekka-nni n letnayen 27 deg waggur-nni n ɣuct yezrin. Deg tedwilt-agi n useggas-a, yella-d usenɛet n waṭas n tewsatin (leṣnaf) n teksiwin n tmurt n Leqbayel. D tagnit anda i ttwasneɛtent teksiwin n yal tama, tawaḍiwt, taɛeẓẓugt, taḥemzit...atg. Llant teksiwin tiqdimin n zik, llant daɣen tmaynutin-agi i d-yettnulfun. Am wakken daɣen i d-llant waṭas n temsikniyin-nniḍen, yecban afexxar, tamemt, lfeṭṭa, idlisen...atg. Yella-d diɣ wahil adelsan deg ttiɛad, timeɣriwin n ccna, asenɛet n wamek i d-yettili zzwaǧ n zik, asenɛet n yiselsa n zik, timezgunin...atg. Amaynut n tezrigt-agi, d timsizzelt n “tqendurt n wuraɣ” i yettunefken i tqendurt ifazzen, i usebɣes n urmud-agi n lexyaḍa. Ula d isaragen, ama ɣef tgemmi tadelsant s umata neɣ ɣef llebsa n zik, llan-d di ttiɛad, i wakken ad ẓren yilmeẓyen azal n lbus-agi d wacu i d anamek-nsen, azalen-nsen ɣef tdamsa d tmetti. Tazrigt-agi tis 9, gan-tt d tajmilt i tcennayt Malika Domrane, i lmend n tikli-ines taẓurant deg ccna aqbayli, i d-yefkan aṭas i tezlit taqbaylit. D tiddukkla tadelsant « Tagmat n Yiḥemziyen » i d-yessuddsen leqdic-a, s tallelt n tesqamut n taddart akked Useqqamu aɣerfan aɣiwan n Yilula Umalu. S tallelt n waṭas n yidisan gar-asen: Tanmehla n yidles n lwilaya n Tizi Uzzu, Tanmehla n usegmi taɣelnawit n lwilaya n Tizi Uzzu...atg. Ɣer taggara, ad nesmekti kan belli, taddart-agi n Yiḥemziyen i ibeɛden s wazal n 60 n yikilumiṭren ɣef unẓul-asamer n Tizi Uzzu, tufrar-d taddart-a n 600 n yimezdaɣ, tesɛa ugar mraw d semmus n tnemsal n tigni (lexyaḍa).

A. A.

0