Ass-nni n ttlata 28 ɣuct 2018, i tessuli s wudem unṣib tezrigt tis ukkuẓet n tjiḥlit n Yiwaḍiyen, i d-yella deg uɣerbaz n watmaten Ifrani n tɣiwant n Yiwaḍiyen. D leqdic i d-yeḍran deg tɣiwant n Yiwaḍiyen gar 24 d 28 ɣuct-agi iɛeddan. D tafaska i d-yuɣalen aseggas-a deg tezrigt-is tis rebɛa (04). Tedda ɣef teɣzi n 5 wussan, imi tebda ass-nni n lǧemɛa 24 , deg tasebḥit n wass, temdel tiwwura-s ass-nni n ttlata 28 deg waggur-nni n ɣuct yezrin. D tafaska n tqendurt n Leqbayel i d-tettheggi yal aseggas Useqqamu aɣerfan aɣiwan (APC) n Yiwaḍiyen s tallelt n Useqqamu aɣerfan awilay (APW) n Tizi Uzzu, seg useggas n 2014. Ma ɣef yiswi n tfaska-agi, yenna-d uselway n tɣiwant n Yiwaḍiyen: “Taksiwt n Yiwaḍiyen tettwassen deg tmurt n leqbayel merra, tura yeqqim-d kan asuffeɣ-ines ɣer 47 n liwlayat-nniḍen n tmurt, ayɣer ala mačči ula ɣer tmura tiberraniyin. Nebɣa daɣen ad nseḥbiber ɣef ugerruj-agi n tmeṭṭut taqbaylit, i yettekkan deg tgemmi tadelsant n tmurt n tmazɣa…”. Deg tedwilt-agi n useggas-a, yella-d usenɛet n waṭas n tewsatin (leṣnaf) n teksiwin n tmurt n leqbayel. Ugar n 30 n yimsikniyen i d-yerran i teɣri n uttekki deg tfaska-agi, i d-yussan seg 4 n tɣemmar n tɣiwant n Yiwaḍiyen. Llant teksiwin tiqdimin n zik, llant daɣen timaynutin-agi i d-yettnulfun. Am wakken daɣen i d-llan waṭas n leqdicat idelsanen deg wahil, yecban, afraq n warrazen i yinelmaden i d-yufraren deg yikayaden n taggara n useggas aɣurbiz (5e, BEM akked BAC). Tella-d diɣ tmeɣra meqqren n ccna sɣur ucennay Ali Amrane, i yettekkin deg tejmilt n tesmiḍent i d as-yuɣalen i ucennay Slimane Azem. Ɣer taggara, ad nesmekti kan belli, taɣiwant-agi n Yiwaḍiyen yettwassnen s tqendurt n leqbayel (Tawaḍiwt), tettwassen daɣen s waṭas n yiwudam-nniḍen, i d-yefkan aṭas i tutlayt akked yidles amaziɣ s uamata d win n tmurt n leqbayel s wuzzig, gar-asen ameɣnas Bessaoud Mohand Arab akked ucennay ameqqran Slimane Azem…atg.
Adaoun Abdelghani