Par DDK | 3 Septembre 2018 | 813 lecture(s)

Amsizwer uzzig Lwennas Meɛtub

Banen-d yigemmaḍ n teẓrigt tis ukuẓet

Seld kra n uɛeṭṭel i d-tḥettem teswiɛt, berrḥen-d ussan-a iɛeddan yisebtar Asdawan d Iḥulfan s yismawen n wid i d-yufraren s yiḍrisen-nsen ifazen deg teẓrigt tis ukuẓet (4) n umsizwer uzzig Lwennas Meɛtub, d tajmilt i umdan-a agrawliw, ameɣnas, i yefkan tudert-is ɣef yidles-is. I yessawḍen s taɣect-is ad d-yawi ayendin, ama i ugdud-is neɣ i tutlayt-is. Akken walan yimheggiyen n umsizwer-a, atmaten Mhenni Xalifi d tmerḥumt Kaysa Xalifi, mačči kan aṭas i yettɛuzzun amdan-a n lɛali armi i as-ttarran tijmilin s yal abrid, maca ula d amḍan n yimekkiyen, i ireffden imru akken ad senfalin iḥulfan-nsen, irennu seg teẓrigt ɣer tayeḍ. Ulamma arrazen mačči d wid yufayen, wid akk yekkin gzan awal n tiɣri i iḍebɛen, yuɣ lḥal, s "Ad aruɣ tutlayt-iw, ad rreɣ tajmilt i uzamul". Deg uberreḥ-a dɣa, usan-d am wakka yismawen n yimifriren : Amḍiq amezwaru n uselmad Nasir Ɛekkuc, seg Ayt Smaɛel, s uḍris-is “Meɛtub Lwennas, d awezɣi ad ak-nerr tajmilt”. Amḍiq wis sin n umaru Fahim Mesɛuden, n Yigersafen, i yellan tura di Fransa, s uḍris-is “Ay izem”. Ma yella d amḍiq wis kraḍ, yuɣal-d i tmedyazt Fazya Ṭabu, s uḍris-is i tzewwel “Meɛtub Lwennas”. Nasir Ɛekkuc, win yewwin arraz amezwaru, yenna : « S lferḥ d ameqqran i qubleɣ lexber-a, imi wwiɣ amḍiq amenzu n umsizwer Meɛtub Lwennas i d-yettheggi gma Xalifi Mhenni akked uletma-s Kaysa, tin yewwḍen leɛfu n Rebbi. Arraz-a ad t-hduɣ d tajmilt i ubabat n umennuɣ Lwennas Meɛtub ». Fahim Mesɛuden, iwumi d-isaḥ warraz wis sin, yenna-d si tama-s: « Tanemmirt. D ayen yelhan. Awi-d ukan mi yelha uḍris ».

M. K.

0