Par DDK | 3 Septembre 2018 | 692 lecture(s)

Ajdid deg tira

Yeffeɣ-d wammud Tabrat n Kaysa Xalifi

Yettwasiẓreg-d ussan-a kan n wayyur n ɣuct yezrin, s wudem awdiɛ, wammud n tullisin n tmarut Kaysa Xalifi, i aɣ-yeǧǧan ass n 25 yunyu 2018. Yeffeɣ-d wammud-a, i tura iseggasen iɛeddan, ɣer teẓrigin timaynutin Ccix Muḥend Ulḥusin, deg waɣir n Tizi Uzzu, am waken i d-iberreḥ yakan umaẓrag. Ayen yerzan taḥawact taseklant i yettawi, ddant-d deg udlis-a 7 n tullisin ɣef wannect-nni d isental, s yizwal n « Amek armi teḍra », « I yexdem ugama », «Aẓar yeṭṭafar tara», «Ccfawa n teqcict», «Acikaw n laman», «Tuɣalin ɣer din» akked «Amcum ageswaḥ n taddart». Taneggarut-a dɣa tewwi yis-s Kaysa Xalifi arraz wis sin deg tfaska n tmedyazt i d-tessuddes tddukkla Lbacir Amellaḥ aseggas n 2015. S umata, teɛreḍ Kaysa s uɣanib-is n tira, ad tessiweḍ kra n tebratin s ubrid n teqsiḍin, ama ɣef tudert, ddunit, tayri, idles, tawacult, lasel d waṭas n tlufa-nniḍen. Yewwi-d ad d-nesmekti d akken yella yetturaǧu wammud-a n tullisin, bu 116 n yisebtar, ad d-yeffeɣ ɣer teẓrigin Tira n Bgayet s uzwel n “Ccfawa n teqcict”. Maca, seld sin n yiseggasen d agani, tuɣal tessuter Kaysa amaẓrag wayeḍ, syin tbeddel kra n tullisin s tiyaḍ d timaynutin, degmi I as-tefka ihi azwel ajdid “Tabrat”. Ulamma ur as-teḥḍir Kaysa Xalifi di ddunit-a, yeḍra-d wayen i tebɣa ad d-yeḍru mi d-yeffeɣ dayen amek i t-tura, s tduli i tessarem daɣen. Imi tawlaft-nni n wudem amezwaru, d yiwet i yeɛzizen fell-as i as-tt-id-ixedmen, akken ad siwḍent izen akken-nniḍen. Wamma amaru, s wayen i d-yeǧǧa, werǧin tesɛi tudert-is taggara. Ma d talɣut i yimeɣriyen yettnadin ɣef tutlayt-nsen, zemren deg kra n wussan ad afen ammud-a amaynut Tabrat deg waṭas n tnedlisin n tmurt.

M.K.

0