Aḥric 11, taggara
Takanaṛt tuḥdiqt, tezger-iten deg sin s nnuba. Teddun yesmektay-iten-id kra d ubrid-nni, ttḥulfun amzun ssnen imeḍqan-nni ideg llan. Dγa ur εeṭṭlen ara, jban kan deg yiwet n tiγilt armi walan axxam n yimawlan-nsen. Serrḥen d tazzla armi d axxam, akken kecmen deg tewwurt, ğellben γef temgerḍt n baba-tsen seg tmendit. Ameγdur n dda Mira bu yisγaren, seg wasmi yemsebḍa yid-sen, ur teffiγ teqreḥ ul-is, ma d tameṭṭut-is Miγisa, ur tt-id-tessaweḍ ara tegnit n yimir-n d tamuddirt, ufan-tt-in warraw-is tettwamḍel. Duduc, tessureg-d iciwi-s γer tγerγert, yal tiγmert tuγal ceṭṭḥent deg-s twiztin, Ḥmiṭuc yessers-d daγen ayen i d-yewwi deg uqelmun-is, yekfa lḥif, temlal tasa d win turew, yegguja laẓ seg uxxam. Ddren ussan n tmeddurt-nsen s umata almi d ass ideg yal yiwen deg-sen yewweḍ sani ara naweḍ akk.
GM. (Izarismen Mira d Miγisa ddmeγ-ten-id seg “Aweryan n yizarismen imaziγen” n Mass Kamal Uzerrad, acku anamek n yizarismen-agi yettak anzi s ayen gan deg tmacahut yimawlan i tarwa-nsen: – Miγisa d talγa tuntit n Amiγas, Amiγis “Win icelεen, yeskaden”, seg Umyag iγas. – Mira seg Amiru neγ Amirew “tiγin n wawal; awafeq”, seg umyag mirew “aγ awal, mṣalaḥ, msefrak, wafeq”).
Seg kabyle.com