Par DDK | 10 Septembre 2018 | 481 lecture(s)

Tarihant Tajmilt i ucennay Arezki Oultache

I wakken ad yeqqim yisem-is i lebda

Ad as-tuɣal tejmilt meqqren i yiwen gar yisulas n tezlit taqbaylit, i yefnan tudert-is gar usefru akked uẓawan, acennay Arezki Oultache. Yetturaǧun ad yili ttiɛad-a deg taddart-is Tarihant, yettabaɛen ɣer tɣiwant n Boudjima di tama n Makouda. Tajmilt-a i yuklal acḥal-aya i lmend n wayen i d-yefka, thegga-tt-id tddukkla tadelsant n taddart Tarihant. Ad yili usiher-agi adelsan ass n lǧemɛa, 14 cutember 2018, ad d-yezdi tawacult n tẓuri s umata d tin n yicennayen s wuzzig. Ad yili wahil d amerkanti, ideg ara tebdu tejmilt-agi, ɣef 10h00 n ssbeḥ s usbeddi n usebdad n ucennay Arezki Oultache, ara d-yilin deg umḍiq i wumi qqaren “Agouni”, yellan deg tlemmast n taddart, i wakken kan ad yeqqim yisem-is deg tkatut akked umezruy. Am wakken daɣen ara d-yili usersi n tmeqqunt n yijeǧǧigen ɣef uẓekka-s. Syin akkin, mi yezgen wass, ad kemmlen leqdicat-nniḍen idelsanen deg uɣerbaz amenzu Fahem Mohand n taddart-agi n Tarihant, s snat n temsikniyin, yiwet ɣef umecwar-is di tẓuri akked tudert-is, ma d tis snat n wayen yettwarun fell-as di tɣamsa akked ttsawer-is. Ad ilint diɣ, tnagiyin ɣef tudert-is sɣur yiɛeggalen n twacult-is akked yimeddukkal icennayen d wiyaḍ merra. Ad ikemmel wahil deg tmeddit n wass, ɣef lewhi n 16h, ad yili usarag d uskasi ɣef wazal n unaẓur-agi deg tezlit taqbaylit. Yetturaǧu ad tekfu tejmilt-agi, s yiwet n tmeɣra n ccna ideg ara d-ccnun aṭas n tezlatin-ines, swayes yessuzen imferǧen-is. Aṭas n yiwudam n ccna n teqbaylit i yetturaǧun ad rzun ɣer dinna i wakken ad as-rren tajmilt, i d-aɣ-d-nnan yimsuddsen n tejmilt-agi.

A. A.

0