Par DDK | 10 Septembre 2018 | 392 lecture(s)

Fransa

Izen n Nicolas Hulot i umaḍal

Ahat ur yelli yettraǧu yiwen ad d-yini Nicolas Hulot, aneɣlaf aqbur n ubeddel akuluji di tmurt n Fransa, ayen akken i d-yenna tasebḥit n wass n aram yezrin, 28 ɣuct, srid deg umaṭṭaf n France Inter ideg i d-yella d inebgi. Yefren ihi ad yejbed iman-is seg unabaḍ (lḥukuma) seld mi t-yekcem 14 n wayyuren ɣer deffir. S wawalen-a dɣa i yefren uneɣlaf aqbur ad iceggeɛ izen i ugdud afransis, maca daɣen i umaḍal s umata: « Ad ṭṭfeɣ i tikkelt tamezwarut taɣtest akk iweɛren di tudert-iw. Ur bɣiɣ ad rnuɣ ad skiddibeɣ ɣef yiman-iw. Ur bɣiɣ ara ad d-yettban zun ma lliɣ deg unabaḍ, anamek-is aql-aɣ deg ubrid ilaqen ɣef taluft-a n twennaḍt. Ihi, ad tt-gezmeɣ di rray, ad d-ṭṭixreɣ seg unabaḍ ». Ad d-nesmekti d akken, ɣef wawal-is, segmi yekcem anabaḍ n tmurt n Fransa, yella wayen i d-ḥellan i lfayda n twennaḍt, maca drus. «Fransa tqeddec ugar n waṭas n tmura, maca ur tqeddec ara s ddeqs», i d-yenna. Ulamma Fransa aql-itt gar tmura i iqudren cwiṭ imtawayen n Paris, wanag meskud ur sneqsen asufeɣ n lgaz afuḥan i yettḍurrun s waṭas tignaw, ur sneqsen deg useqdec n tpistisidin, ur tesɛiḍ acu yemmuggen s tidet, i iwala. Aṭixer-a i yeswehmen kra, yenna-d fell-as Mass Nicolas Hulot « D taɣtest n tezdeg d tmasit », seld aṭas n wayyuren netta yettnaɣ weḥd-s. Ilaq ad d-nini aṭixer-a n Nicolas Hulot d izen mači kan i Fransa, maca i umaḍal merra, akken i d-yekkat s nnuɛ netta s timmad-is. Imi, dima deg taluft i yerzan amaḍal merra-s, d umenẓaw amɣar n Tferka, yenna-d: « Ssarameɣ aṭixer-iw ad d-yawi afiqi d unadi n tmetti ɣef tilawt n umaḍal. Dakken ur trebbeḥ ara Turuft ala ma terbeḥ Tferka (Tafriqt). Ma nɛedda gar tegnit n ustenyi n ugatu n yimal akked Tferka? Tiririt d uhu ». Yella abeɛda Nicolas Hulot d yiwen i yettḥuddun ɣef twennaḍt si temẓi-s, armi d-yesnulfa deg useggas n 1990 Tasbeddit Nicolas Hulot i Ugama d umdan (i yuɣalen d Tasbeddit i Ugama d umdan). Yella daɣen seg yiqerru n terga yettwassnen Ushuaia. Imi d-yessegza amek nettnama tiwaɣiyin n twennaḍt war ma nga kra, a-t-an yeḥsa umaḍal amek i d-teggra twennaḍt-a gar waccaren n tsertit.

M. K.

0