Accueil Tamazight Aṭas n yiɣeblan i iɛeggben aḥric-agi n tdamsa

MAÂTKAS - Yiwen n wass n tussna ɣef tmeẓriwin n unegmu n uzemmur : Aṭas n yiɣeblan i iɛeggben aḥric-agi n tdamsa

883
- PUBLICITÉ -

Suddsen-d Srabes n tfellaḥt n dayra n Mɛatqa d tenmehla n srabes n tfellaḥt n ugerzu n Tizi-Uzzu, ass-nni n ttlata iɛddan 4 deg waggur n cutember 2018, yiwen n wass n tussna d usali ɣef tmeẓriwin n unegmu n uḥric n uzemmur deg temḍiqt n Mɛatqa.

- PUBLICITÉ -

Sidren ass-agi n tussna, Tanmehla n srabes n tfellaḥt n Tizi-Uzzu ɣef uqerrur-is Mass Makhlouf Laib, anemhal n srabes n tfellaḥt, Mass BelaassiaA M’hamed, aselway n Useqqamu aɣelnaw n uḥric n lɣella n uzemmur (CNO) d waṭas n yimḍebbren n srabes n tfellaḥt n Tizi-Uzzu. Ɣer yidis n yimḍebbren n srabes n tfellaḥt n Mɛatqa, llan, diɣ, yimussnawen n yilemmasen n tfellaḥt (ITMAS) n Buxalfa. Am wakken ḥeḍren aṭas n yifellaḥen d yimɛelmen n tessyar n uzemmur. Isallen i d-wwin deg wass-agi n tussna, smeḥsen-asen akken iwata wid iḥeḍren deg tzeqqa n yisaragen n Uxxam n yilmeẓyen. Ɣer taggara n usarag, aṭas n yiɣeblan i iɛeggben anegmu n wuḥric-agi agejdan n temḍiqt-agi n Mɛatqa, i d-bedren yifellaḥen Gar wuguren igejdanen i d-bedren yifellaḥen n tɣiwant i yemḍebbren teɛna temsalt, d aɣbel n tenzzuyt d usiǧew n zzit n uzemmur, yenna-d yiwen deg-sen :’’ Aṭas n yiɣeblan i mazal ɛeggbel aḥric-agi n lɣella n uzemmur, gar-asen aɣbel n usiǧew n zzit. Tetteggray-d aṭas n zzit i yimɛalmen n tesyar n uzemmur d yifellaḥen, ur ufin ara iwumi ara tt-ssiǧwen. Deg tallit-nni temharsa, ulac aɣbel-agi n usiǧew, ifellaḥen dima saǧawen lɣella-nsen. Mass Tamzali yettaɣ yakk lɣella n zzit n uzemmur, yessefk kan ad tt-tawiḍ ɣur-s. Ass-a aɣbel-agi n usiǧew yeɛgeb taswiɛt, anda ara naf aṭas n zzit yettwajemɛen ɣer yifellaḥen, s imal tettiqqsiḥ. Yewwi-d ad nafet tifrat i uɣbel-agi n taǧewt n zzit.’’ Yiwen n ufellaḥ-nniḍen yuɣal-d s wawal ɣef uɣbel n wayen d-yettagrayen seg uzemmur, ladɣa amegruc d umurejj i d-yewwi ad nesḥbiber ɣef twennadt d ugama. Dɣa yenna-d : ‘’ Amegruc d umurejj, d saḥ, glun-d s lmaḍerrat ɣef twennadt d ugama, maca aya, mačči d ayen yeɛnan afellaḥ, akken ad yexedem ttawilat iwatan i useḥbiber ɣef twennadt, ladɣa imdunen n useffi n umurejj. Ɣef uwanek i d-yewwi, ad yessemres ttawilat iwatan i lfayda n tdamsa d useḥbiber ɣef twennadt. Aɣbel n umegruc, ad yuɣal d leɣbar’’. Ula d ugur n tulya n yiberdan n tfellaḥt, yuɣal-d deg umeslay n wass-agi n tussna ɣef yilsawen n waṭas n yifellaḥen : gren tiɣri i uɛawed n tmuɣli deg tulya n yiberden d uqeɛɛed n wid yellan yakan. Deg wawal n yimḍebber amezwaru n srabes n tfellaḥit n Tizi-Uzzu, yuɣal-d ɣer lexṣas n lɣella n uzemmur ma nesrews-it d lɣella n tmura-nniḍen n yillel agrakal, anda ara naf lɣella n tzemmurt teggar-d kan azal n 4 n litrat n zzit n uzemmur, yenna-d : ‘’Maca ma neḍfer abrid n tussna d usemres n ttawilat atraren, nezmer ad d-ter tzemmurt ugar n 14 n litrat. Dɣa yebder-d aṭas n yiɣeblen i yeǧǧan tazemmurt ur d-tettara ara aṭas n lɣella. Gar-asen : afras, akraz, tissit n tzemmurt…atg. Ɣef wakken iwala :  »Llan kra ala deg tallit n ucraw i d-ttmektin tazemmurt ». Imesidren n wass-agi, yal wa d asentel i d-yewwi ɣef uḥric n uzemmur, ama d ayen yeɛnan lahlakat yettḥazen tazemmurt, ttawilat n useḥbiber d umḍiq n lɣella n uzemmur deg tdamsa n temḍiqt-agi. Ad d-nesmekti kan d akken tamḍiqt n Mɛatqa, tesɛa ugar n 3 000 n hiktaren n wakan n uzemmur, d-yettarran azal n umelyun (1) n litrat n zzit deg useggas.

Ali Zalouk

- PUBLICITÉ -