Par DDK | 10 Septembre 2018 | 817 lecture(s)

Tizi Uzzu Timsizelt n ddabex uḍar gar tudrin

Tuɣal-d teqbuct i terbaɛt n taddart n At Zɛim

Deg wass-n n ssebt iɛeddan, amenzu n cutember 2018 ɣef 16h , i d-tella temlil-it n telɣuɣa n ddabex n uḍar gar tudrin, i d-tesuddes tɣiwant n Tirmitin n Buɣni, anda urarent snat n trebuyaɛ yewwḍen ɣer uḥric aneggaru, tarbaɛt n yilmeẓyen n taddart n At Zɛim d yilmeẓyen n taddart n Tirmitin n Buɣni. Snat n trebuyaɛ, urarent deg unnar n Qantijja, anda ḥeḍren aṭas n yimfarğen seg snat n tudrin, srabes laman d yimḍebren n snat n tɣiwanin uɣur tabaɛent tudrin-agi. Tedda temlilit akken iwata, dɣa deg 90 n dqiqa n wurar, snat n trebuyaɛ-a, beggnent-d iman-nsent. Nudant yakk akken ad d-awint iswiyen, maca ur sawḍent ara, ɣas ma aṭas tyitiwin igerzen i d-yellan seg snat n trebuyaɛ. Akud n temlilit n usaḍef yekfa, anefray n temlilit yerna akud n zyada 30 n dqiqa, maca dima ulac iswiyen. Syin, tewweḍ temlilit ɣer tyitiwin n uḍar, anda i d-yuɣal wafud i tarbaɛt n taddart n At Zɛim, i d-yewwin taqbuct-agi. Imezdaɣ n taddart n At Zɛim d yimezdaɣ n tudrin i as-d-yezzin, ferḥen nezzel s teqbuct-agi, anda d-heggan yiwet n tmeɣra meqqren i yimyuraren d usleɣmay. Ad d-nesmekti kan d akken timsizelt-agi n ddabax n uḍar, tebda deg umenzu n waggur n ɣuct iɛeddan, tsuddes-id tɣiwant n Tirmitin n Buɣni, anda ttekkant 16 n trebuyaɛ n tudrin n unẓul n temdint n Tizi-Uzzu.

Ali Zalouk

0