Accueil Tamazight Snat n tgejda n tmaziɣt i aɣ-yeǧǧan

Tamettant n Abdellah Haman d Moulay Seddik Slimane : Snat n tgejda n tmaziɣt i aɣ-yeǧǧan

597
- PUBLICITÉ -

Tutlayt d yidles amaziɣ yers-d fell-asen leḥzen imi snat n tgejda iɣef sennden ɣlint. Ruḥent sanda akken ara n-qqiment i lebda. Amek ihi ur d-yettru ara yigenni ɣef sin n yirgazen yefkan tudert-nsen i merra ɣef tutlayt n tmaziɣt d yidles-is.

- PUBLICITÉ -

Dda Abdellah Haman, mmi-s n At Dawed, yuklal ass-a ad as-nerr tajmilt xas ulamma s wawal kan d kra n yijerriden, acku yura amecwar n tudert s yisekkilen n wureɣ. Deg temẓi-s, ibedd mgal amnekcam Afrensis, i wakken ad ikemmel amecwar-is deg umennuɣ ɣef tutlayt-is. Netta, mačči seg wid yeqqaren nḥemmel tamaziɣt, meɛna yella seg wid i tt-iḥemlen, i tt-yettarun, i tt-yesselmaden. Aya, ibeggen-it-id s yidlisen yura d yisargen i d-yesker di yal tagnit, ladɣa anda yettidir deg Wehran. Talallit n Useqqamu unnig n timmuzɣa yerna-as afud meqqren i umeɣnas i wakken ad yettili deg tfaskiwin. Yezzi-d meḥsub i waṭas n temnaḍin n tmurt anda yessuzer tamussni-s d timidt-is deg leqdic ɣef tutlayt d yidles amaziɣAss-a, tamettant tecellqef-it uqbel ad yidir ayen akk i yessaram ad t-iwali : tamaziɣt tuɣ timnaḍin n tmurt n Lezzayer merra. Ass n 9 cutember yezrin i yewweḍ leɛfu n Rebbi umeɣnas ameqqran n tmaziɣt, amyaru, amedyaz, amjahed Dda Ɛebḍella Ḥaman ɣef usemmud n 82 n yiseggasen, di temdint n Wehran, mbeɛd lehlak iḍullen. Ssmana-a taneggarut, yekcem ɣer sbiṭer, izad fell-as waṭṭan, yewweḍ s anda ara naweḍ akk. Dda Ɛebḍella, yenǧer-d abrid n timmuɣnest segmi yella meẓẓi, yessezri iseggasen n tegrawla tazzayrit deg tkurmut n Berwageyya, Lambez d Wehran. Dɣa imir i yebda yettaru deg yiseggasen-nni n 50 timezgunin d yisefra. Syin ikemmel deg ubrid n tira mi tefra tegrawla, yella gar wid i d-yeslulen tiddudkla Numidya n Wehran, yexdem ayendin d asarag deg yirebbi-s. Uɣalent-as waṭas n tejmilin dinna neɣ di tmurt n Leqbayel. Yettuneḥsab d ababat n tsekla tamaziɣt deg Wehran, acku d netta i d-ineǧren abrid n tira s tmaziɣt. Gar wayen yura, ad naf : Ɛmer n wewriz (tamacahut), Merwas di lberǧ n yiṭij 1 d 2 (tamezgunt), Amjaḥ, Tawaɣit n tayri (ungalen), Tudert-iw di tegrawla (tanaga)… atg. Tella-d temḍelt-is ass-nni n letnayen yezrin ɣef lweḥda n uzal s uneḥḍur n waṭas n yiwudam n tsekla tamaziɣt, imyura, imedyazen d yinaẓuren. Ad iṣebber Rebbi tawacult-is, yeǧǧa-asen-d lbaraka. Moulay Seddik Slimane, tigejdit-nniḍen n temnaḍt n Timimun i yessufɣen tarwiḥt kra kan n wussan mbeɛd tamettant n Dda Abdellah Ḥaman. S tidet, yeḥzen Uhellil n Gurara, imi d nettat i yellan deffir tikti-agi i yesnerna Dda Lmulud. D ameddakkel-is, d amwelleh-is deg tama-agi n tneẓruft, Moulay yella-d di lmendad i usufeɣ n ugerruj n tmahaqt. D aɛessas ɣef yidles, yettḥarab ɣef tutlayt, tettunefk-as tegnit ad yelmil d Dda Lmulud i wakken ad sbedden ayen yellan deg timawit ad yettwajerred s tira. Amecwar-nsen ɣezzif, lebɣi-nsen ur yesɛi tilas, maca ɣas akken ur ssawḍen ara ɣer taggara n yiswi, lsas i sersen yeǧǧhed, ireṣṣa. Gnet di talwit.

S. M. / K. A.

- PUBLICITÉ -