Γas akka neẓra akkit belli tudert ur tettdum ara, ɣes ma yella ubrid n taggara d yiwen, meεna ulac d acu yellan qerriḥ ugar n tmettant. Taneggarut-a, ur telli d yiwet, imi yal yiwen amek ara yemmet. Wagi s usehwu, winna s lehlak, wayeḍ ahat mebla tamentilt. Nabil Keddar, d yiwen n yilemẓi i yesεan azal n 35 n yiseggasen, ḥemmlen-t akkit medden. Imi yettusen s wul-is meqqer, d ṭadsa ur nettixir ɣef wudem-is. Nabil, yella yeznuzu lḥut deg ssuq n Xerrata. D argaz iḥemmlen axeddim-is. Meεna tamettant ur tzeggel ula d yiwen. Ass n sed yezrin, 8 cutember, iṛuḥ yilemẓi-a, ad iseggeḍ iselman, am yal ass, ɣas akken ur yeẓri belli ur d-yettuɣal ara. Cwiṭ n yisragen i iεeddan segmi i yelḥeq, yettwaberreḥ yisalli n tmettant-is. Nabil, yeɣreq deg umḍiq i yellan d taɣbalut n lqut-is. Seld isalli-a, ṛuḥen aṭas n yimezdaɣ ɣer umḍiq-nni ahat i wakken ad t-id-sellken. Meεna ifut lḥal, Rebbi yexdem ccɣel-is. Γas ma yella kecmen deg waman, ttqelliben fell-as, ur t-ufin ara. Yerna ddeqs n wakud, nutni d aεṛaḍ. Ma d wiyaḍ seg tama-nniḍen, ssawlen i yimeggiyen n Uḥuddu aɣarim. Ineggura-a, rran-d i tiɣri, rnu ayen yeseffraḥen s tidet d yiwen n uqeddac seg-sen i yellan deg yimuṛas, i d-yusan s tazzla imi I as-ɣran. Wagi d Mass » Reḍwan F « , i yufan tafekka-s, ijbed-itt-id seg waman, s ufus n tallelt n yimeddukkal-is. Medden merra i iḥeḍren dinna, snemmren-t ɣef leqdic-is, ma yella d netta yerra-asen : « Ulac d acu giɣ, d wagi ay d axeddim-iw, am nekk, am yemeddukkal-iw». Imawlan-is d wid i t-yesnen, snemmren seg tama-nsen kra n win i d-yegren afus-is i temεiwna. Nettazen talwit i umerḥum.
K. K.