Deg tazwara n wayyur n cutember i d-yella unekcum aɣurbiz di tmurt n Lezzayer. Llant tamiwin ideg iɛedda akken iwata, ma deg kra n waɣiren, aṭas n yeḥricen ideg yuget lexṣas. Deg wayen yerzan tamaziɣt, aseggas-a, tekcem deg waṭas n yiɣerbazen n tmurt. Deg umalu n tmurt, di Wehran swaswa, aseggas-a fkan-d kraḍ n yidgan imaynuten i tmaziɣt deg uɣerbaz amenzu, imi aselmed-is dagi yebda deg useggas n 2015, d ayen yessawḍen amḍan n yiselmaden ass-a ɣer tẓa. D tidet drus maḍi, ma nesserwes amḍan-a ɣer twilayin-nniḍen yecban Ɛin Timucent s 34 n yiselmaden, Tala Yemsan s 21 n yiselmaden, Belɛebbas s 16 n yiselmaden, u ma neẓra d akken qrib azgen n yimezdaɣ n Wehran d Leqbayel. Maca, ugur mačči da i yella, acku ma ilaq ad yuget umḍan n yiselmaden, ilaq daɣen ad yili uḍfar-nsen, ad afen ttawilat iwulmen akken ara xedmen timsirin i yinelmaden akken iwata, acku tẓa-agi n yiselmaden i yellan, ha-ten-in ttɛummun deg yilel meqqren n yiɣeblan si yal tama. Ad d-nebder gar wuguren-a : Ar tura, anagar iselmaden n tmaziɣt ur nesɛi ara tasebḍut n wakud (werɛad bdan aselmed).Ur asen-d-wwin ara idlisen iɣurbizen. Maḥyaf n yinemhalen n yiɣerbazen ɣef yiselmaden-a. Ma d ugur agejdan, ad t-naf yerza tamezduɣt, acku werɛad i asen-fkan tixxamin ideg ara ttilin. Ad d-nesmekti d akken ṣa (7) gar yiselmaden-a, d tiḥdayin i d-yusan si tmurt n Leqbayel. Ad d-nini, diɣ, belli iselmaden-a, nudan ɣef yizerfan-nsen, imi i d-ssudsen agraw akked unemhal n usedwel n Wehran d kra n yimasayen ass n 6 cutember yezrin, mmeslayen deg-s ɣef wuguren i d-ttemlilin d tifrat-nsen. Ɣef waya i d-yewwi ɣef yimassayen n usedwel s umata, ad muqqlen di tazwara ɣer wuguren i d-ttemlilin akk yixeddamen n usegmi aɣelnaw i tifin n tifrat akken ara yelḥu uɣerbaz deg ubrid n ṣṣwab, deg usirem, ad yecbu yiwen wass iɣerbazen n tmura irebḥen.
Khaled Achoui