Ass n ssebt 22 cutember 2018, ad tebdu temlilit tagraɣlant n ugellid Sifaxs deg Ɛin Timucent, ara d-yilin s usentel-agi: “Tagelda n Yimasisilen: Sifaks d umyager n Siga deg 206 uqbel talallit n Ɛisa”. I lmend n usiher-agi ara d-yilin seg 22 ar 24 Cutember-a deg Ɛin Timucent, iberreḥ-d umaru amatu n Useqqamu unnig i timmuzɣa, Si El Hachemi Assad, s tilin n 28 n yisaragen ara d-fken yimnadiyen izzayriyen akked yiberraniyen. Ttwaferqen yisaragen-agi ɣef ssetta n yisental igejdanen, yecban: “Tazwert ɣer Tgelda n Yimasisilen”, “Tadiplumasit d temsisiyin (alliances)”, “Deg wayen yerzan asarag n Siga”, “Iɣbula inganen (matérielles) d yiseklanen ɣef tgelda tamasisilit”, “Tigemmi tangant (materiel) d trangant(immateriel) s yisem-is d aɣbalu n tmussni ɣef umezruy” akked “Tuddsa tasenzikant (lebni-ines)”. Ttwafernen-d 28 n yisaragen-agi sɣur teseqqamut tussnant n umyager-a gar 95 n yisaragen i d-yettwassumren, sɣur yimnadiyen akked yiselmaden n tesdawiyin, maca ala 28 ara d-yilin ɣef teɣzi n tlata wussan n temlilit-agi. Imi i d-tella tmerna n yiwen wass-nniḍen, mebɛed mi yetturaǧu niqal ad tili kan gar 22 akked 23 cutember, tura ad tkemmel azekka-in n 24 cutember. Annect-agi, i wakken ad neǧren abrid n uttekki i tsuta tamaynut, yenna-d Mass Assad: “Ad nefk tagnit i yisdawanen i d-yettheyyin agerdas n duktura deg tesdawiyin yemgaraden n tmurt”. Yetturaǧu, ad ilin 16 n yineskinen (exposés) ara d-sneɛten yisdawanen ilemẓiyen s talɣa n tduba tubrinin (tables-rondes). Am wakken ara ittekki daɣ yiwen n ugensas (représentant) n Tuddsa n Yiɣlanen yeddukklen i usegmi,tussna d yidles (UNESCO), ɣef wakken i d-yenna Mass Assad si Weḥran ussan iɛeddan. Amyager-agi ɣef ugellid anumidi Sifaks, ad ttekkin deg-s ddeqs n yinmezruyen d yimsenziken iɣelnawen d yiberraniyen ara d-yesneɛten imahilen-nsen ɣef yiwet n tallit i yesɛan azal d ameqqran deg tgelda n Yimasisilen, yerna, ad d-ssiwlen ɣef temlilt n Sifaks deg “Umyager n Siga” i d-yellan deg 206 uqbel talallit n Ɛisa.Timlilit-agi tussnant tameqrant, iswi-nnes d « Aḍaf (maîtrise) n umezruy adelsan, anmetti d usertan n tallit tanumidit i yessefken ad tili d aɣbalu n tehragt (inspiration) d zzux i yilmeẓyen-nneɣ”, ɣef wakken i t-id-yenna Mass Assad. Ma ɣef yiswan n temlilit-a, yerna-d : « Tis snat, d asebɣes n yinadiyen ɣef tgelda n Yimasisiliyen d usenɛet n yinadiyen d tezrawin yettwaxdamen yakan ɣef temnaḍt-agi n tmurt-nneɣ. Tis kraḍ, d asaki ɣef useḥbiber i ilaqen ad d-yili ɣef tgemmi taɣelnawt n temnaḍt-agi tamazrayt Siga akked uslali n wassaɣen d yiẓedwan gar yimnadiyen yerran lwelha-nsen ɣer usentel-agi n tgelda n Yimasisiliyen ». Ad tili diɣ temsikent tasensegmant (pédagogique) d tameqqrant ɣef Yinumidiyen d Yimuṛiyen deg Tefriqt talemmast taqburt, yerna ad tɛeddi ɣef wacḥal n yiɣerbazen d wammasen n usileɣ amsadur n lwilaya-agi n Ɛin Timmuccent. Am wakken, daɣen, ara d-mmeslayen ɣef teɣzi n temlilit, ara d-yeḍrun di Ɛin Timmuccent neɣ di Lmersa Ben Mhidi ( i d-yezgan ɣer tama n Siga), ɣef tgemmi n yimeḍqan isenzikiyen (sites archéologiques), yellan deg wakal n tgelda n Yimasisiliyen, i yettnuneḥsaben d agerruj ideg teffer tmussni n umezruy d yiẓuran n ugdud amaziɣ amesbaɣur i mazal ur yettwassnen ara imi ulac tirawin fell-as.
Adaoun Abdelghani