Yenqes aṭas umḍan n tsekkurt n Tmazɣa (Alectoris barbara) deg yiseggasen-a ineggura deg lwilaya n Tizi Uzzu, tewweḍ almi qrib, ad tenger tewsit-agi n yifrax di tama-agi.
I lmend n waya, Tafidiralit n ugmar n lwilaya n Tizi Uzzu, tebda-d tamhelt tis snat n berru n 500 n tsekrin n Tmazɣa, deg ddurt iɛeddan deg tama n Bubhir, deg tɣiwant n Yifiɣa, 38 n yikilumitren deg unẓul n Tizi Uzzu. Am wakken daɣen i bran i 500 n yiḥiqlen deg temnaḍt-agi, azal n 20 n wussan-aya. Deg temhelt-a, bran i umur amezwaru ideg llant 500 n tsekrin, akken ad ilint d timnirin i tid ara d-iḍefren, sakin ad kemmlen berru n umur wis sin akked wis tlata, seg wass-agi n letnayen, mebɛed mi skeyden tadawsa n tsekrin-nni iwumi bran yakan. Yenna-d umasay n Tfidiṛalit n ugmar, Arezki Aider, belli: “Yessefk ad ttwaḥerzen yiɣersiwen n temnaḍt-a, ladɣa tisekrin d yiḥiqlen-agi iwumi bran ussan-agi. Yerna limmer 10% seg tsekrin akked yiḥiqlen-agi iwumi bran, ad selken si tmettant, ad tettwaḥseb temhelt-a d turbiḥt”. Yenna-d diɣ: “Seg yimir-a d asawen, ad yettwagdel ugmar (uṣegged) deg tama-a n Yifiɣa d temnaḍin i d as-d-yezzin ɣef teɣzi n sin n yiseggasen”. I lmend n waya, yenna-d Mass Aider Arezki, belli tafidiṛalit d yicriken-is, bɣan ad sseḥbibren ɣef uqader n tallit n ugmar d ugdal-ines deg tallit n usefrurex. Iberreḥ-d diɣen s usexdem n terbaɛin timezzayin n tɛessast, i wakken ad yili uqader n lqanen-agi. Ɣer taggara, ad d-nesmekti belli tawsit-agi n yifrax (tasekkurt n tmazɣa), tettedir ama deg Tefriqt n ugafa, ama deg unẓul n Lurpa, yecban: Ṭṭelyan akked Spenyul.
Ghani Amazigh