Deg umenzu n waggur n cutember 2018, rnan yimɛelmen n ttawilat n usiweḍ gar Dayra n Mɛatqa ( Taɣiwant n Ṣsuk n Letniyen, d tɣiwant Mɛatqa) d ugerzu n Tizi-Uzzu, ssuma n usiweḍ s wazal n 10 n yidinaren. Yella-d waya mebla ma sɛelmen ula d yiwen, ama d tanmehla n usiweḍ n Tizi Uzzu, ama d imsiklen (voyageurs). Sdat n array-agi n tmerna, imsiklen n yal ass yettawin abrid-agi n ugerzu wis 147, yerkeb-iten lɣiḍ meqqren. Dɣa ɣef leḥsab n yimeslayen-nsen, aya dayen yeffɣen i usaḍuf, dayen i d-yellan mebla ma sɛelmen imsiklen d imḍebbren teɛna temsalt. Yiwen imsikel ur yufi ara ula d awalen iwatan akken ad d-ibeggen lɣiḍ-ines sdat n array-agi n tmerna, dɣa yenna-d : ‘’Deg tmurt-a, yal wa ixeddem akken yebɣa, ala taḥraymit ɣer tayeḍ. Timerna deg yal isufar ɣef leḥsab n wudmawen. Seg dqiqa ɣer tayeḍ, s lebɣi n yal yiwen, ad yernu akken yebɣa, amzun ulac imḍebbren n uwanak . Tamurt, ha-tt-an la tleḥḥu srid s iɣzer. Dɣa amek ara yeqbel wallaɣ n umdan timerna deg tewtilin yecban tidak n usiweḍ n temḍiqt-agi-nneɣ ? Ulac amḍiq anda ḥebsen ttawilat-nsen, gren-naɣ sdaw n tlegwit-nni (pont) n unnar amellal, amzun d ilfan, mebla ma ḥṣan s imihan n umḍiq-agi. Rnu ɣef yimsiklen, ḥebbsen-ten deg tlemmast n ubrid ameqqran, dayen i d-yeglan s waṭas n twaɣiyin ɣef yimsiklen. Amek akka ad neqbel s tmerna ? Ur sɛin ara ula d tesriḥ n tmerna seg tenmehla n usiweḍ.’’ Tawiɣit, d akken ula gar-asen yimsiwḍen, ur dduklen ara ɣef yiwen n rray, amur ameqqran deg-sen ur qbilen ara rray-agi n tmerna, dɣa yal wa iteddu d lebɣi-is. Wa itekkes kan am zzik, wa yerna deg ssuma.Tanmehla n usiweḍ n ugerzu n Tizi-Uzzu, seg yidis-is, tewwet-d deg rray-agi n tmerna, mazal ar tura urɛad i d-tufa tifrat i temsalt-agi. Iɣeblan, zgan gar sin yidisan, imsiwḍen d tenmehla n usiweḍ, seg useggas n 2013 ɣer wass-a. Aya, yusa-d seld aɣbel n tufɣa n yimsiwḍen n dayra n Mɛatqa seg umḍiq n uneḥbus n ttawilat n usiweḍ n Bouhinoune, ɣer umḍiqt i deg llan tura s sseba n ssuma yulin i d-ḍelben yimḍebbren n umḍiq-agi n uneḥbus. Rnu ɣef waya, yella-d deg sin wagguren iɛeddan uneḥbus ɣef lxedma s sseba n tuksa n lekwaɣeḍ i wugar n 15 n yimɛelmen n ttawilat n usiweḍ s sseba n unekcum n ttawilat ɣer tamdint.
Ali Zalouk