Yerza-d ass n wahad 12 di cutembeṛ yezrin lwali n twilayt n Bgayet Mass Tufiq Mezhud ɣer tɣiwant n At Smaεel, i wakken ad iwali liḥala n tɣiwant-agi. Ddeqs i yellan ttraǧun ttiεad-a, imi d ayen ara d-yeglun s ubaɣur i temnaḍt n Udrar n Fad s umata. Deg trezzaf-agi, wwin-d yimeḥdar ameslay ɣef waṭas n tɣawsiwin i iceɣben At taddart. Abeεda; tiqenṭert n Bumejbeṛ, taklinit n Tizwal, tamruzt tudbilt (annexe administrative) n Tala Ɛta i yettwaldin ass-n s ddaw leεnaya n lwali d Mass Sadek Rebaεi aselway n tɣiwant. Ad d-nesmekti d akken aṭas i iḥeḍṛen dinna, am tselwayt n tdayra n Yiderginen, Mass Ɛebdun Nasir amazan n FFS n At Smaεel d waṭas n wiyaḍ. Am wakken i d-yella daɣen usfuggel n uselḥu n trisiti s wafud afukan (énergie solaire) deg uɣerbaz amenzu ‘Taregragt taqburt ‘. Asenfar-a aneggaru, d amezwaru di twilayt n Bgayet merra-is, akken i d-nberreḥ ddurt iεeddan, ala sin n yeɣerbazen i yesfaydin deg-s. Ɣef 11:00, seld awal i d-yenna, yefka-d lwali aserreḥ i uselḥu n uṣenfar n wafud afukan. Syin yekcem ɣer tneɣrit n uswir n useggas amenzu anda i iwala amek-it waddad n uɣerbaz-a. Ma yella d imezdaɣ n taddart, furṣen tagnit i wakken ad as-hedren ɣef wayen i ten-iceɣben, am temsalt n uεiwed n yijeεbuben n waman, aṣenfar n lgaz i yeqqimen d azgen, iberdan akked waṭas n temsal-nniḍen. Ɣef usentel-agi, yenna-aɣ-d yiwen : «Limer ad i yi-d-fken awal, ur keffuɣ ara lehdur alamma d azekka, imi taɣiwant-nneɣ txus seg myal tama, ladɣa tuddar yeggugen ɣef tɣiwant». Ma yella d lwali seg tama-s, yefka-asen awal belli ad yeεṛeḍ ad d-yaf tifrat i kra n yiεewwiqen.
K. K.